کرم: عسکریت پسندوں کے حملے میں 6 پاکستانی اہلکار ہلاک، متعدد زخمی

واشنگٹن (ش ح ط) پاکستان کے شورش زدہ صوبے خیبر پختونخوا کے قبائلی کرم میں عسکریت پسندوں نے سیکیورٹی فورسز پر حملہ کیا، جس کے نتیجے میں چھ اہلکار ہلاک جبکہ چھ دیگر زخمی ہو گئے۔

ڈیلی اردو کے مطابق یہ واقعہ تحصیل سنٹرل کرم کے علاقے تور غنڈئ چیک پوسٹ کے قریب پیش آیا، جہاں عسکریت پسندوں نے گھات لگا کر حملہ کیا۔

ہلاک ہونے والے اہلکاروں میں حوالدار شوکت حبیب، حوالدار سبزل، سپاہی عبدالحالق، سپاہی رفیع اللہ، لانس نائیک امجد اور سپاہی وقاص شامل ہیں۔

حکام کے مطابق زخمیوں میں ایف سی اہلکار محمد جاوید خان، محمد ایاز، رب نواز، عامر شہزاد، محمد رضوان اور محمد زید سلطان شامل ہیں۔ تمام زخمیوں کو فوری طور پر اسپتال منتقل کیا گیا، جہاں دو اہلکاروں کی حالت تشویشناک بتائی جاتی ہے۔

حملے کے بعد سیکیورٹی فورسز نے عسکریت پسندوں کے ٹھکانوں کو بھاری توپ خانے سے نشانہ بنایا، جس کے نتیجے میں متعدد جنگجو ہلاک اور زخمی ہوئے۔

سیکورٹی حکام نے بتایا کہ ہلاک ہونے والوں میں کالعدم تحریک طالبان پاکستان کے کمانڈر عثمان خیبری سمیت چھ مسلح عسکریت پسند شامل ہیں۔  علاقے میں سیکیورٹی فورسز کا آپریشن تاحال جاری ہے۔

تاہم پاکستان فوج کے شعبہ تعلقات عامہ (آئی ایس پی آر) کی جانب سے ابھی تک کوئی بیان جاری نہیں ہوا۔