کرم میں سیکورٹی فورسز کا آپریشن، 7 دہشت گرد ہلاک، 5 زخمی

راولپنڈی (ک م) سیکیورٹی فورسز نے صوبہ خیبر پختونخوا کے قبائلی ضلع کرم میں آپریشن کے دوران کالعدم تنظیم تحریک طالبان پاکستان کے 7 دہشت گردوں کو ہلاک کردیا گیا ہے۔

پاکستانی فوج کے شعبہ تعلقات عامہ آئی ایس پی آر کے مطابق سیکیورٹی فورسز نے سنٹرل کرم میں خوارج دہشت گردوں کی موجودگی کی اطلاع پر انٹیلی جنس کی بنیاد پر آپریشن کیا۔

آئی ایس پی آر کا مزید کہنا ہے کہ ہلاک خوارج دہشت گردوں کے قبضے سے بھاری مقدار میں اسلحہ و گولہ بارود برآمد کیا گیا ہے۔

ہلاک خوارج دہشت گرد سیکیورٹی فورسز اور شہریوں کےخلاف متعدد دہشتگرد کارروائیوں میں ملوث تھے، علاقے میں پائے جانے والے کسی اور خارجی کے خاتمے کےلیے کلیئرنس آپریشن جاری ہے۔

آئی ایس پی آر کا کہنا ہے کہ پاکستان کی سیکیورٹی فورسز ملک سے دہشتگردی کی لعنت کو ختم کرنے کےلیے پُرعزم ہیں۔