کرم میں شدت پسندوں نے سیکیورٹی اہلکار کو اغوا کے بعد ہلاک کردیا

صدہ (نمائندہ ڈیلی اردو) صوبہ خیبر پختونخوا کے قبائلی ضلع کرم کی تحصیل سینٹرل کرم کے علاقے مناتو میں کالعدم تنظیم کے شدت پسندوں نے سیکیورٹی فورسز کے اہلکار لانس نائیک محمد فاروق کو اغوا کے بعد ہلاک کردیا۔

ذرائع کے مطابق، لانس نائیک محمد فاروق چھٹی پر گھر عید منانے جارہے تھے جب شدت پسندوں نے انہیں راستے میں گاڑی سے اتار کر اغوا کر لیا اور نامعلوم مقام پر منتقل کر دیا۔ بعد ازاں، انہیں ہلاک کر دیا گیا۔

لانس نائیک محمد فاروق کی نماز جنازہ ہیڈکوارٹر صدہ میں ادا کی گئی، جس میں سیکیورٹی فورسز کے افسران، اہلخانہ اور مقامی افراد نے شرکت کی۔

سیکیورٹی حکام نے واقعے کی تحقیقات اور ملوث عناصر کے خلاف کارروائی کا اعلان کیا ہے۔