کرم: پاراچنار میں معدنیات پر قبائل کے درمیان تنازع، 5 افراد ہلاک

پاراچنار (ڈیلی اردو) صوبہ خیبر پختونخوا کے قبائلی ضلع کرم کے مرکز پاراچنار میں 2 قبائل کے درمیان معدنیات کے معاملے پر تنازع شدت اختیار کر گیا، دو طرفہ فائرنگ کے نتیجے میں 5 افراد ہلاک ہوگئے۔

پاراچنار میں اپرکرم بوغکئی گنداو دیہات کے 2 قبائل کے درمیان گزشتہ روز سے بھاری ہتھیاروں سے فائرنگ کا تبادلہ جاری ہے، پاڑہ چمکنی علاقے میں مارٹر گولہ پھٹنے سے 5 افراد جان افراد ہلاک ہوئے جن کا تعلق چمکنی گنداو قبائل سے تھا۔

ہلاک ہونے والوں میں احسان اللہ، راوف خان، محمد انور اور وسیم خان شامل ہے۔ اس کے بعد حالات انتہائی کشیدہ ہوچکے ہیں اور دو طرفہ بھاری اسلحہ کا استعمال جاری ہے۔

پولیس ذرائع کے مطابق معدنیات نکالنےکے تنازعے پر 5 افراد کے اغوا کے بعد فائرنگ کا تبادلہ جاری ہے۔

پولیس کا کہنا ہے کہ دونوں قبائل کے درمیان تنازع معدنیات راہداری پر پیش آیا ہے پولیس، سیکیورٹی فورسز اور مقامی عمائدین فریقین میں فائربندی اور صلح صفائی کرانے کے لیے کوشاں ہیں۔

ڈپٹی کمشنر ضلع کرم واصل خان کا کہنا ہےکہ جرگہ اور مزاکرات کے ذریعے مسئلےکے حل کی کوشش کی جارہی ہے۔