کرم: پاراچنار کے نواحی گاؤں میں 6 دھماکے، 2 افراد ہلاک، 3 زخمی

واشنگٹن (ش ح ط) پاکستان کے شورش زدہ صوبے خیبر پختونخوا کے قبائلی ضلع کرم کے صدر مقام پاراچنار کے نواحی گاؤں نستی کوٹ میں چھ متواتر بارودی دھماکوں کے نتیجے میں دو افراد ہلاک جبکہ تین شدید زخمی ہو گئے۔

ہلاک ہونے والے افراد کی شناخت اکبر حسین اور اقبال حسین کے ناموں سے ہوئی ہے۔

عینی شاہدین کے مطابق دیگر دھماکے اس وقت ہوئے جب لوگ ہلاک ہونے والے افراد کی نماز جنازہ میں شرکت کے لیے آ رہے تھے، جس سے جانی نقصان میں اضافہ ہوا۔

پولیس کے مطابق دھماکے شہریوں کو نشانہ بنانے کے لیے کچے راستوں میں نصب کیے گئے تھے۔ زخمیوں کو فوری طور پر ڈسٹرکٹ ہیڈ کوارٹر اسپتال پاراچنار منتقل کر دیا گیا ہے جہاں ان کی حالت تشویشناک بتائی جا رہی ہے۔

ہلاک ہونے والے افراد کا تعلق شیعہ کمیونٹی سے بتایا جاتا ہے۔

واقعے کے بعد پولیس اور سیکیورٹی فورسز نے علاقے کو گھیرے میں لے کر سرچ آپریشن شروع کر دیا ہے جبکہ نامعلوم دہشت گردوں کے خلاف مقدمہ درج کر لیا گیا ہے۔