کرک آپریشن میں کالعدم ٹی ٹی پی کا بنگلہ دیشی دہشت گرد مارا گیا

پشاور (ڈیلی اردو) پاکستان کے شورش زدہ صوبے خیبر پختونخوا کے ضلع کرک میں سیکیورٹی فورسز اور پولیس کے مشترکہ آپریشن کے دوران 17 شدت پسند ہلاک ہوئے، جن میں ایک غیر ملکی دہشت گرد بھی شامل تھا۔

سیکیورٹی ذرائع کے مطابق ہلاک دہشت گرد کی شناخت سعد الخراسانی عرف بنگلا دیشی کے طور پر ہوئی ہے۔ بتایا گیا ہے کہ سعد الخراسانی نے افغانستان پہنچنے کے لیے تقریباً 3 لاکھ روپے خرچ کیے تھے۔ ہلاک دہشت گرد کے قبضے سے بنگلادیش کا شناختی کارڈ، کرنسی اور دیگر سامان بھی برآمد ہوا۔

تحقیقاتی حکام کے مطابق ماضی میں بھی کارروائیوں میں دو سے تین بنگلا دیشی شہری مارے جا چکے ہیں۔ یہ افراد مبینہ طور پر تبلیغی سرگرمیوں کے لیے افغانستان گئے تھے، جہاں شدت پسند گروہوں نے انہیں اپنے نیٹ ورک میں شامل کر لیا تھا۔ پاکستانی انٹیلی جنس معلومات کی بنیاد پر بنگلا دیشی حکام نے بھی دو مشتبہ افراد کو گرفتار کر لیا ہے۔

آئی ایس پی آر کے مطابق کارروائی کالعدم تحریک طالبان پاکستان (ٹی ٹی پی) کی موجودگی کی اطلاع پر کی گئی۔ آپریشن کے دوران سات زخمی شدت پسند فرار ہو گئے، جن کی تلاش کے لیے سیکیورٹی فورسز نے علاقے کا گھیراؤ کر کے مزید کارروائیاں کی ہیں۔ ہلاک دہشت گردوں سے اسلحہ اور گولہ بارود بھی برآمد ہوا۔ یہ شدت پسند سیکیورٹی فورسز کے خلاف کارروائیوں اور بے گناہ شہریوں کی ہلاکت میں ملوث تھے۔

کالعدم ٹی ٹی پی سے منسلک سوشل میڈیا اکاؤنٹس کا دعویٰ ہے کہ کرک کے گاؤں درشہ خیل میں سیکیورٹی فورسز کے ہاتھوں ہلاک ہونے والوں میں ایک بنگلا دیشی شہری سیف اللہ سعد بھی شامل تھا، جو پاکستان آنے اور ٹی ٹی پی میں شمولیت کے لیے تقریباً 3 لاکھ روپے خرچ کر چکا تھا۔ تاہم، اب تک آئی ایس پی آر یا خیبر پختونخوا پولیس نے کسی غیر ملکی شدت پسند یا نام "سیف اللہ سعد" کی باضابطہ تصدیق نہیں کی ہے۔