کرک میں پولیس آپریشن، 4 مطلوب دہشت گرد ہلاک

پشاور (ڈیلی اردو) پاکستان کے شورش زدہ صوبہ خیبر پختونخوا کے ضلع کرک میں پولیس کے خفیہ اطلاعات پر کیے گئے آپریشن کے دوران چار مطلوب دہشت گرد ہلاک ہو گئے ہیں۔

مرکزی پولیس دفتر کے مطابق آپریشن کے دوران دہشت گردوں نے پولیس ٹیم پر فائرنگ کی، جس کے بعد پولیس نے جوابی کارروائی کرتے ہوئے چاروں دہشت گردوں کو ہلاک کر دیا۔

پولیس حکام کے مطابق کرک اور کوہاٹ پولیس نے مشترکہ انٹیلی جنس بیسڈ آپریشن کرک اور کوہاٹ کے سرحدی علاقے میں واقع کھٹک ڈیم کے قریب صابرآباد تھانے کی حدود میں کیا۔

پولیس کے مطابق فائرنگ کے تبادلے میں کمانڈر زاہد گروپ سے تعلق رکھنے والے چار انتہائی مطلوب دہشت گرد ہلاک ہوئے۔

مرکزی پولیس دفتر کا کہنا ہے کہ ہلاک ہونے والے دہشت گرد پولیس اہلکاروں کے قتل سمیت متعدد سنگین مقدمات میں مطلوب تھے۔

پولیس نے الزام عائد کیا ہے کہ ہلاک دہشت گرد 2025 میں کرک کے ایس ایچ او بانڈہ عمر نواز اور کوہاٹ کے انسپکٹر طاہر نواز کے ہلاکت جبکہ 2026 میں ڈی ایس پی اسد محمود، سب انسپکٹر انار گل اور دیگر پولیس اہلکاروں کی ہلاکتوں میں ملوث تھے۔

آپریشن کے بعد علاقے کو گھیرے میں لے لیا گیا جبکہ مزید شواہد جمع کرنے اور ممکنہ ساتھیوں کی تلاش کے لیے سرچ آپریشن شروع کر دیا گیا ہے۔

مرکزی پولیس دفتر کے مطابق دہشت گرد نیٹ ورک سے متعلق مزید معلومات حاصل کرنے کے لیے تحقیقات بھی جاری ہیں۔