کرک میں پولیس گاڑی پر فائرنگ، جوابی کارروائی میں ایک حملہ آور مارا گیا

کرک (نمائندہ ڈیلی اردو) صوبہ خیبر پختونخوا کے ضلع کرک کی تحصیل بانڈہ داؤد شاہ میں پولیس گاڑی پر موٹرسائیکل سواروں نے فائرنگ کر دی، پولیس کی جوابی کارروائی میں ایک حملہ آور ہلاک جبکہ دوسرا فرار ہو گیا۔

پولیس حکام کے مطابق ہفتہ کی شب تھانہ خرم کی ایس ایچ او کی موبائل وین طوطکی کے قریب معمول کی گشت پر تھی کہ اچانک شدت پسندوں نے ان کی گاڑی پر فائرنگ شروع کر دی۔ پولیس کی بروقت جوابی کارروائی کے دوران ایک حملہ آور موقع پر مارا گیا جبکہ دوسرا فرار ہونے میں کامیاب ہوگیا۔

پولیس کے مطابق، ہلاک ہونے والے شدت پسند کے قبضے سے ایک کلاشنکوف، دو میگزین اور ایک ہینڈ گرنیڈ برآمد کر لیا گیا ہے۔

واقعے کی اطلاع ملتے ہی ڈی پی او کرک پولیس کی بھاری نفری کے ہمراہ جائے وقوعہ پر پہنچے اور اپنی قیادت میں طوطکی کے پہاڑی علاقے میں فرار ہونے والے ملزم کی تلاش کیلئے سرچ آپریشن شروع کر دیا۔

پولیس ذرائع کے مطابق، ہلاک ہونے والا شدت پسند پولیو ٹیموں اور پولیس اہلکاروں پر حملوں میں ملوث تھا۔

پولیس حکام کے مطابق ہلاک دہشت گرد کا تعلق کالعدم تحریک طالبان پاکستان سے تھا۔سی ٹی ڈی حکام اس سلسلے میں مزید تحقیقات کر رہی ہیں ۔