کرک میں کالعدم ٹی ٹی پی کے خلاف بڑا آپریشن: 17 دہشت گرد ہلاک

کرک (نمائندہ ڈیلی اردو)  پاکستان کے شورش زدہ صوبے خیبر پختون خوا کے ضلع کرک میں پولیس اور  سیکورٹی فورسز نے کالعدم تنظیم ٹی ٹی پی کے دہشت گردوں کے خلاف آپریشن کرکے 17 دہشت گرد ہلاک کر دیے جبکہ آپریشن تاحال جاری ہے۔

ڈی پی او کے مطابق کرک کے تھانہ شاہ سلیم کے علاقے درشہ خیل میں سیکورٹی فورسز اور کالعدم ٹی ٹی پی کے دہشت گردوں کے درمیان بدھ کی صبح سے جاری آپریشن میں 17 دہشت گرد ہلاک ہوگئے۔

ڈی پی او شہباز الہی نے ڈیلی اردو کو بتایا کہ مقامی انٹیلی جنس ذرائع سے مصدقہ اطلاع ملی تھی کہ ٹی ٹی پی ملا نزیر گروپ کے دہشت گرد اس علاقے میں موجود ہیں، جس پر فوری کریک ڈاؤن کیا گیا۔ انہوں نے کہا، “کئی گھنٹوں تک جاری شدید جھڑپ کے بعد 17 دہشت گرد ہلاک کیے گئے۔ آپریشن ابھی جاری ہے۔”

ڈی پی او نے مزید کہا کہ آپریشن کے دوران سیکورٹی فورسز کے تین جوان معمولی زخمی ہوئے جنہیں طبی امداد کے لیے مقامی ہسپتال منتقل کر دیا گیا ہے۔ اُن کے بقول زخمیوں کی حالت مستحکم ہے اور انہیں فوری طبی دیکھ بھال فراہم کی جا رہی ہے۔

شہباز الہی نے زور دے کر کہا کہ "علاقے کا امن کسی کو خراب کرنے کی ہر گز اجازت نہیں دی جائے گی" اور اس عزم کا اعادہ کیا کہ “پولیس اور سیکورٹی فورسز مل کر امن دشمنوں کا صفایا کریں گے اور ریاست و عوام کے خلاف عناصر کو کہیں بھی چھپنے کی جگہ نہیں ملے گی۔”

مقامی رہائشیوں نے بتایا کہ جھڑپوں کی آوازیں کئی گھنٹوں تک سنی گئیں اور علاقے میں سکیورٹی فورسز کی گاڑیوں اور ہیلی کاپٹرز کی آمد و رفت دیکھی گئی۔ متعدد مکانات کے نزدیک سرچ آپریشن بھی کیا گیا تاہم ابتدائی اطلاعات میں عام شہریوں کے زخمی ہونے یا املاک کو شدید نقصان پہنچنے کی اطلاعات موصول نہیں ہوئیں۔