کوئٹہ میں سی ٹی ڈی کا انٹیلی جنس بیسڈ آپریشن، داعش کے 3 دہشت گرد ہلاک، مغوی بازیاب

کوئٹہ (ڈیلی اردو) صوبہ بلوچستان کے دارالحکومت کوئٹہ میں کاؤنٹر ٹیررازم ڈیپارٹمنٹ (سی ٹی ڈی) نے خفیہ اطلاعات پر مبنی کامیاب آپریشن کے دوران فائرنگ کے تبادلے میں کالعدم تنظیم داعش کے 3 انتہائی مطلوب دہشت گردوں کو ہلاک کر دیا۔

سی ٹی ڈی کے مطابق کوئٹہ میں ’کالعدم تنظیم داعش سے تعلق رکھنے والے دہشت گردوں‘ کی موجودگی کی اطلاع ملی تھی، جس پر کارروائی کی گئی۔

کارروائی کے دوران سی ٹی ڈی کی ٹیم پر دستی بموں کے علاوہ ان پر فائرنگ کی گئی جبکہ سی ٹی ڈی کی جوابی کارروائی میں تین دہشت گرد مارے گئے۔

سی ٹی ڈی کے مطابق اس کاروائی میں یہ ملزمان فائرنگ کے تبادلے میں مارے گئے۔ تاہم آزاد ذرائع سے تاحال ان افراد کی فائرنگ کے تبادلے میں مارے جانے کی تصدیق نہیں ہوئی ہے۔

سی ٹی ڈی کے مطابق کوئٹہ میں ہونے والی کارروائی میں ایک کمرے میں زنجیروں سے جھکڑا ایک شخص موجود پایا گیا، جنھوں نے اپنا نام ابو بکربتایا۔ ’ابوبکر نے بتایا کہ انھیں ایک ماہ قبل اغوا کیا گیا تھا‘۔

سی ٹی ڈی کی پانچ روز کے دوران بلوچستان میں تیسری کارروائی تھی۔ اس سے قبل 29 اگست کو کوئٹہ سے متصل ضلع پشین کے علاقے میں ایک ایسی کارروائی میں کالعدم تنظیم تحریک طالبان پاکستان سے تعلق رکھنے والے چار دہشت گرد ہلاک ہوئے تھے۔