کولمبیا میں کار بم دھماکا، 5 افراد ہلاک، 36 زخمی

کیلی (ڈیلی اردو/نیوز ایجنسیاں) کولمبیا کے مغربی شہر کیلی میں فوجی ایوی ایشن اسکول کے قریب کار بم دھماکے کے نتیجے میں کم از کم 5 افراد ہلاک اور 36 زخمی ہو گئے۔ دھماکے سے اردگرد کی عمارتوں اور گھروں کو بھی شدید نقصان پہنچا۔

پولیس کے مطابق کار بم حملے میں شہر کے شمال میں واقع مارکو فیڈل سواریز ملٹری ایوی ایشن اسکول کو نشانہ بنانے کی کوشش کی گئی۔

کیلی کے میئر الیجینڈرو ایڈر نے واقعے کی مذمت کرتے ہوئے ذمہ داروں کے بارے میں معلومات دینے پر بڑے انعام کا اعلان کیا۔ دھماکے کے بعد سیکیورٹی خدشات کے پیش نظر متعدد عمارتوں اور اسکولوں کو خالی کرایا گیا جبکہ شہر میں بڑے ٹرکوں کے داخلے پر پابندی لگا دی گئی۔

یاد رہے کہ اس سے ایک روز قبل شمال مغربی شہر میڈلین کے قریب دیہی علاقے میں پولیس کے ہیلی کاپٹر پر حملے میں کم از کم 12 افراد ہلاک ہوئے تھے۔

ان پے در پے حملوں کے بعد کولمبیا کی حکومت نے ہنگامی طور پر قومی سلامتی کونسل کا اجلاس طلب کر لیا ہے۔

عینی شاہدین کے مطابق کار بم دھماکہ اتنا شدید تھا کہ اردگرد کی گلیوں میں موجود شہری ہلاک ہوئے جبکہ گھروں کو بھی نقصان پہنچا۔ ایک رہائشی نے اے ایف پی کو بتایا کہ ’’ایئر بیس کے قریب کسی چیز کے پھٹنے کی زوردار آواز آئی۔‘‘