کوہاٹ: سیکیورٹی فورسز اور پولیس کی مشترکہ کارروائی سے دہشت گردی کا بڑا منصوبہ ناکام

 کوہاٹ (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع کوہاٹ میں سیکیورٹی فورسز، پولیس اور کاؤنٹر ٹیررازم ڈیپارٹمنٹ (سی ٹی ڈی) کی بروقت اور مؤثر مشترکہ کارروائی کے نتیجے میں دہشت گردی کا ایک بڑا منصوبہ ناکام بنا دیا گیا، جس کے باعث شہر بڑی تباہی سے بچ گیا۔

ڈی پی او کوہاٹ شہباز الٰہی کے مطابق ضلع میں دہشت گردی کے خلاف مؤثر کارروائیاں جاری ہیں۔ مصدقہ خفیہ اطلاعات کی بنیاد پر پولیس اسٹیشن ایم آر ایس کی حدود میں واقع ایک فارم ہاؤس پر چھاپہ مار کارروائی کی گئی، جہاں دہشت گردوں کا ایک منظم گروہ خفیہ طور پر قیام پذیر تھا۔

ڈی پی او کے مطابق اطلاعات تھیں کہ ایک خطرناک دہشت گرد نیٹ ورک کوہاٹ میں بڑی کارروائی کی منصوبہ بندی کر رہا ہے، جس پر سیکیورٹی فورسز، پولیس اور سی ٹی ڈی نے مشترکہ حکمتِ عملی کے تحت فوری کارروائی کی۔ کارروائی کے دوران علاقے کو مکمل طور پر گھیرے میں لے لیا گیا اور جدید نگرانی کے آلات کے ذریعے فارم ہاؤس کی نگرانی کی گئی۔

کارروائی کے دوران دہشت گرد اندھیرے کا فائدہ اٹھاتے ہوئے فرار ہونے میں کامیاب ہو گئے، تاہم وہ اپنے زیرِ استعمال بھاری مقدار میں اسلحہ، دھماکہ خیز مواد اور حساس آلات چھوڑ گئے، جنہیں تحویل میں لے لیا گیا ہے۔ ماہر ٹیمیں برآمد شدہ مواد کا تکنیکی تجزیہ کر رہی ہیں۔

ابتدائی شواہد سے ظاہر ہوتا ہے کہ دہشت گرد ایک منظم منصوبے کے تحت کوہاٹ میں خونریز حملہ کرنے کے درپے تھے، جسے بروقت کارروائی کے ذریعے ناکام بنا دیا گیا۔

واقعے کے بعد شہر میں سیکیورٹی مزید سخت کر دی گئی ہے جبکہ فرار ہونے والے دہشت گردوں کی گرفتاری کے لیے سرچ آپریشن اور ناکہ بندیاں جاری ہیں۔ پولیس نے عوام سے اپیل کی ہے کہ کسی بھی مشکوک سرگرمی کی فوری اطلاع قریبی پولیس اسٹیشن کو دیں تاکہ امن و امان کو یقینی بنایا جا سکے۔