گجرات میں مقامی عالم دین حافظ آفتاب مولا کے قتل کا ڈراپ سین، بیٹا باپ کا قاتل نکلا

گجرات (ڈیلی اردو) صوبہ پنجاب کے ضلع گجرات کے تھانہ ککرالی کے علاقہ بھدر میں معروف عالم دین حافظ آفتاب کے قتل کا ڈراپ سین ہوگیا۔

ڈسٹرکٹ پولیس آفیسر (ڈی پی او) عمر سلامت کے مطابق 5 جون کو حافظ آفتاب کو زیرِ تعمیر مدرسہ بھدر میں فائرنگ کر کے قتل کیا گیا تھا۔

گجرات۔تھانہ ککرالی کے علاقہ بھدر میں قتل ہونے والی معروف عالم حافظ آفتاب مولا کا اندھا قتل ٹریس کر لیا گیا۔مقدمہ کا گواہ سگا بیٹا اور بھانجا قاتل نکلے۔@OfficialDPRPP @rpogujranwala @Gujrat_Police pic.twitter.com/AUobK8Vvxo

— Gujrat Police Pakistan (@Gujrat_Police) June 29, 2021

انہوں نے بتایا کہ گرفتار ملزمان نے عالم دین کے قتل کو ٹارگٹ کلنگ کا رنگ دیا تھا۔

ڈی پی او گجرات کا مزید کہنا تھا کہ میری عوام الناس سے التماس ہے کہ کسی بھی واقعہ کے متعلق پیشگی رائے قائم نہ کریں اور ذمہ داری کا ثبوت دیتے ہوئے پولیس اور اپنے اداروں پر اعتماد رکھیں۔ ہمارے دشمن ایسے واقعات کو فرقہ واریت کی ہوا دیکر اس ملک کو امن کو تباہ کرنے اور اپنے ناپاک عزائم حاصل کرنے کے لئے استعمال کرتے ہیں۔۔

ان کا کہنا ہے کہ مقتول کے بیٹے محمد عبداللہ مولا اور بھانجے عتیق احمد والد محمد اخلاق نے قتل کا اعتراف کرلیا ہے جبکہ گرفتار بیٹے نے پولیس کو بیان دیاکہ والد ماں اور بچوں پر تشدد کرتا تھا، اس لیے قتل کیا۔

دوران تفتیش یہ انکشافات سامنے آئے کہ مقتول حافظ آفتاب مولا اپنے بیوی اور بچوں پر تشدد کرتا تھا جس کا اس کے بیٹے محمد عبداللہ کو رنج تھا۔ عبداللہ کی دوستی عتیق احمد کے ساتھ تھی جو کہ مقتول کا بھانجا بھی تھا۔ عتیق احمد مقتول کی بیٹی کے ساتھ شادی کرنا چاہتا تھا جس پر مقتول راضی نہ تھا۔ دونوں ملزمان نے اپنا اپنا رنج دور کرنے کے لئے حاٖٖفظ آفتاب کے قتل کا منصوبہ بنایا۔ مقتول کا بیٹا اسے زیر تعمیر مدرسہ میں لیکر گیا جہاں پہلے سے موجود ملزم محمد عتیق نے اندر داخل ہونے پر یکے بعد دیگرے فائر مار کر اسے موت کے گھاٹ اتار دیا اور موقع سے فرار ہو گیا۔