گوجرانوالہ میں سی ٹی ڈی کی کارروائی، تحریک طالبان پاکستان کے 2 دہشت گرد گرفتار

اسلام آباد (ش ح ط) صوبہ پنجاب کے ضلع گوجرانوالہ میں سی ٹی ڈی نے کارروائی کرتے ہوئے کالعدم تحریک طالبان پاکستان کے دو دہشت گردوں کو گرفتار کرکے بارودی مواد برآمد کرلیا۔

تفصیلات کے مطابق گوجرانوالہ میں سی ٹی ڈی نے کارروائی کرکے 2 دہشت گردوں کو گرفتار کرلیا۔

ترجمان سی ٹی ڈی کے مطابق خفیہ اطلاع پر پسرور روڈ گوجرانوالہ میں کارروائی کی گئی۔

کالعدم تنظیم تحریک طالبان پاکستان کے دو دہشت گردوں محمد اکمل اور غلام حسین کو گرفتار کر کے ان کے قبضے سے دھماکا خیز مواد اور فنڈز کی رسیدیں برآمد کر لی گئیں۔

ترجمان کے مطابق گرفتار دہشت گرد گوجرانوالہ میں حساس تنصیبات کو نشانہ بنانے کی منصوبہ بندی کر رہے تھے۔ دہشت گردوں کے خلاف مقدمہ درج کر کے ان سے تفتیش کی جا رہی ہے۔