"ہتھیار رکھو، جنگ ترک کرو، امن کو منتخب کرو!"، پوپ لیو

ویٹیکن سٹی (ڈیلی اردو) مسیحیوں کے روحانی پیشوا پوپ لیو نے اتوار کو اپنے ایسٹر کے پیغام میں دنیا کے رہنماؤں سے اپیل کی کہ وہ جاری تنازعات ختم کریں اور اقتدار یا فتح کے لیے کسی منصوبے کو ترک کر دیں۔

سینٹ پیٹر اسکوائر میں جمع ہزاروں افراد سے خطاب میں پوپ نے کہا کہ لوگ تشدد کے عادی ہوتے جا رہے ہیں اور اس سے بے حس ہو گئے ہیں۔ انہوں نے پرجوش انداز میں کہا، ’’جن کے پاس ہتھیار ہیں، وہ انہیں رکھ دیں! جن کے پاس جنگ چھیڑنے کی طاقت ہے، وہ امن کا انتخاب کریں!‘‘۔

پوپ لیو نے اپنے پیغام میں کسی خاص تنازعے کا ذکر نہیں کیا، لیکن یہ پیغام غیرمعمولی طور پر مختصر اور براہِ راست تھا۔ حالیہ ہفتوں میں انہوں نے دنیا کے مسلح تنازعات اور ایران جنگ پر بھی کھل کر تنقید کی ہے۔

منگل کو پوپ نے امریکی صدر ڈونلڈ ٹرمپ سے براہِ راست اپیل کی تھی کہ وہ ایران جنگ ختم کرنے کے لیے کوئی راستہ تلاش کریں۔ 

اتوار کو ایسٹر کے موقع پر سینٹ پیٹر بیسیلیکا کی بالکنی سے ہزاروں افراد سے خطاب کیا گیا اور اسکوائر کو رنگ برنگے پھولوں سے سجایا گیا۔ پوپ نے لاطینی، عربی اور چینی سمیت دس زبانوں میں ایسٹر کی مختصر مبارکباد پیش کی۔