ہنگو میں شدت پسند حملوں کا سلسلہ جاری، 4 پولیس اہلکاروں سمیت پانچ افراد زخمی

واشنگٹن (ش ح ط) پاکستان کے شورش زدہ صوبے خیبر پختونخوا کے ضلع ہنگو میں کالعدم تحریک طالبان پاکستان (ٹی ٹی پی) کے شدت پسندوں نے ایک حملہ کیا، جس کے نتیجے میں چار پولیس اہلکار اور ایک امام مسجد زخمی ہو گئے۔

واقعے کے مطابق یہ حملہ تھانہ سٹی کی حدود میں قاضی تالاب چیک پوسٹ پر پیش آیا، جہاں نامعلوم مسلح افراد نے فائرنگ کی۔ زخمی ہونے والوں میں امام مسجد فرمان اور پولیس اہلکار علی رضا، ناصر، صابر اور عامر حیات شامل ہیں۔ 

پولیس کے مطابق زخمیوں کو فوری طور پر ضلعی ہیڈکوارٹر ہسپتال (ڈی ایچ کیو) ہنگو منتقل کر دیا گیا۔ پولیس کی اضافی نفری موقع پر پہنچ گئی اور حملہ آوروں کے خلاف کارروائی کے دوران فائرنگ کا تبادلہ جاری ہے۔ 

سیکورٹی فورسز نے بھی علاقے کو گھیرے میں لے کر سرچ آپریشن بھی شروع کر دیا ہے۔

یہ حملہ ہنگو میں سیکیورٹی فورسز کے خلاف حالیہ مہینوں میں شدت پسندانہ کارروائیوں کی تازہ کڑی ہے۔ 

یاد رہے کہ 27 نومبر کو ہنگو کے علاقے شاہو روڈ پر پولیس چیک پوسٹ پر ہونے والے ایک حملے میں تین پولیس اہلکار ہلاک ہو گئے تھے، جبکہ 24 اکتوبر کو بم دھماکے میں ایس پی آپریشنز اسد زبیر آفریدی سمیت تین پولیس اہلکار ہلاک ہوئے تھے۔

اسی دوران ہنگو کی تحصیل دوآبہ میں دہشت گردوں نے پولیس پر حملہ کیا، جس میں ایس ایچ او عمران الدین زخمی ہوئے، جبکہ جوابی فائرنگ میں دو حملہ آور ہلاک کر دیے گئے۔