یورپی پارلیمان میں ڈیڑھ ارب یورو کے دفاعی منصوبے کی منظوری دیدی

برسلز (ڈیلی اردو/ڈی پی اے ) یورپی پارلیمنٹ  نے منگل کو ایک 1.5 ارب یورو (1.7 ارب ڈالر)  مالیت کے ایک منصوبے کی منظوری دی ہے، جو یورپی یونین میں دفاعی سرمایہ کاری کو فروغ دینے اور یوکرین کی حمایت کے لیے فنڈ فراہم کرے گا۔

یورپی دفاعی صنعتی پروگرام (EDIP) روس کے 2022 میں یوکرین پر حملے کے بعد یورپ کے دفاع کو مضبوط بنانے اور ہتھیاروں کی پیداوار کے لیے شروع کیا گیا ہے۔

منصوبے کے تحت فنڈنگ حاصل کرنے کے لیے، دفاعی مصنوعات کے اجزاء کی کم از کم 65 فیصد قیمت یورپی یونین یا شراکت دار ممالک میں پیدا ہونی ہونی چاہیے۔

یورپی پارلیمنٹ کی صدر روبیرٹا میٹسولا نے کہا کہ ای ڈی آئی پی یورپی دفاعی صنعت کو مضبوط بنانے، مشترکہ خریداری اور پیداوار کو فروغ دینے اور یورپ کی یوکرین کے لیے مدد بڑھانے میں استعمال ہو گا۔

یورپی حکومتوں نے طویل عرصے تک ای ڈی آئی پی کے لیے اہلیت اور دیگر مسائل پر بحث کی۔ فرانس نے یورپی صنعت کو فروغ دینے کے لیے ’یورپی خریدیں‘ کے تحت قوانین کی حمایت کی، جبکہ نیدرلینڈز جیسے ممالک نے امریکہ، برطانیہ اور دیگر ممالک سے ہتھیار خریدنے میں زیادہ لچک کا مطالبہ کیا۔

پارلیمنٹ کی منظوری قانونی عمل کا آخری مرحلہ ہے، جس کے بعد یورپ کے 27 رکن ممالک پروگرام کی توثیق کریں گے، جو متوقع طور پر رسمی کارروائی ہو گی۔