یورپی پارلیمنٹ کی عمارتوں میں ایرانی سفارت کاروں کے داخلے پر پابندی

برسلز (ڈیلی اردو) یورپی پارلیمنٹ نے ایران میں حکومت مخالف مظاہرین کے خلاف خونریز کریک ڈاؤن کے ردعمل میں تمام ایرانی سفارت کاروں اور نمائندوں کے یورپی پارلیمان کی عمارتوں میں داخلے پر پابندی عائد کر دی ہے۔ پیر کے روز یورپی پارلیمان کی صدر روبیرٹا میٹسولا نے اس فیصلے کا اعلان کیا۔

روبیرٹا میٹسولا نے سوشل میڈیا پلیٹ فارم ایکس پر کہا کہ ایران کے ساتھ اب معمول کے انداز میں کام نہیں ہو سکتا، ’’جب ایران کے بہادر عوام اپنے حقوق اور آزادی کے لیے کھڑے ہیں، تو میں نے آج یہ فیصلہ کیا ہے کہ اسلامی جمہوریہ ایران کے تمام سفارتی عملے اور دیگر نمائندوں کو یورپی پارلیمنٹ کے تمام دفاتر میں داخلے سے روک دیا جائے۔‘‘ 

انہوں نے مزید کہا کہ یورپی پارلیمنٹ ایسے نظام کو جائز حیثیت دینے میں کوئی کردار ادا نہیں کرے گی جو ’’تشدد، جبر اور قتل کے ذریعے خود کو قائم رکھے ہوئے ہے۔‘‘

یہ اقدام یورپی یونین کی جانب سے ایران میں جاری انسانی حقوق کی خلاف ورزیوں کے باعث بڑھتے ہوئے دباؤ اور سخت موقف کی عکاسی کرتا ہے۔