یوکرین میں فوج بھیجنے کیلئے تیار ہیں، برطانوی وزیراعظم

لندن (ڈیلی اردو/بی بی سی) برطانوی وزیراعظم کیئر سٹارمر نے کہا ہے کہ وہ یوکرین کے تحفظ اور امن مذاکرات کے لیے معاہدے کو یقینی بنانے کی غرض سے برطانوی فوجی دستے یوکرین بھیجنے کے لیے تیار ہیں۔

برطانوی وزیراعظم نے کہا ہے کہ اگر ہم نے پوتن کو مستقبل کی کسی بھی جارحیت سے روکنا ہے تو پھر یوکرین میں دیرپا امن کی بحالی ضروری ہے۔

پیرس میں یورپی ممالک کے ہونے والے اجلاس میں شرکت سے قبل برطانوی وزیراعظم نے کہا ہے کہ اگر ضرورت ہوئی تو پھر ایسے میں ان کا ملک اپنی فوج بھیج کر یوکرین کو تحفظ کی ضمانت دینے کو تیار ہے۔

اطلاعات کے مطابق امریکہ اور روس کے درمیان امن مذاکرات کل یعنی منگل کو سعودی عرب کے دارلخلافہ ریاض میں ہوں گے۔

رپورٹس کے مطابق ریاض میں امریکہ اور روس کے درمیان ہونے والے امن مذاکرات کے لیے یوکرین کو مدعو نہیں کیا گیا ہے۔

واضح رہے کہ یورپین رہنماؤں کو بھی ان مذاکرات میں شرکت کی دعوت نہیں دی گئی ہے۔ اب جلدی میں فرانس کے صدر نے پیرس میں پیر کو اس موضوع پر کانفرنس طلب کی ہے۔

واشنگٹن نے یوکرین جنگ سے متعلق اپنی پالیسی میں بڑی تبدیلی کا عندیہ دیا ہے۔