یوکرین پر روسی فضائی حملے، 4 ہلاکتیں اور 40 سے زائد زخمی

کییف (ڈیلی اردو) یوکرینی صدر وولودیمیر زیلنسکی نے بتایا ہے کہ روسی مسلح افواج نے ہفتے اور اتوار کی درمیانی شب یوکرین پر بڑے فضائی حملے کیے، جن میں تقریباً 500 جنگی ڈرونز اور 40 سے زائد میزائل استعمال کیے گئے۔

صدر زیلنسکی کے مطابق ان حملوں میں کم از کم چار افراد ہلاک اور 40 سے زائد زخمی ہوئے، جبکہ ملک کے سویلین انفراسٹرکچر کو شدید نقصان پہنچا۔

انہوں نے سوشل میڈیا پلیٹ فارم ٹیلیگرام پر ایک پوست میں لکھا، “یوکرین کے خلاف اپنی جارحیت میں ماسکو جنگ اور انسانی ہلاکتوں کا سلسلہ جاری رکھنا چاہتا ہے اور وہ اس بات کا حقدار ہے کہ عالمی برادری اس پر بھرپور دباؤ ڈالے۔”

صدر زیلنسکی نے مزید کہا، “روس پہلے کی طرح اب بھی یوکرینی شہروں پر دہشت گردانہ حملے کر رہا ہے اور دانستہ طور پر یوکرینی شہروں کی آبادی کو ہدف بنا رہا ہے۔”

یوکرینی فوج کے ذرائع کے مطابق یہ حملے تقریباً 12 گھنٹے تک جاری رہے اور دارالحکومت کییف، اس کے مضافات، زاپوریژیا اور اس کے نواحی علاقے، میکولائیف اور اوڈیسا جیسے شہروں کو ہدف بنایا گیا۔