آبنائے ہرمز میں تیل بردار اور کنٹینر بردار جہاز پر نامعلوم سمت سے حملے

تہران (ڈیلی اردو) آبنائے ہرمز میں دو الگ الگ واقعات کے دوران تیل بردار اور کنٹینر بردار جہاز نامعلوم سمت سے داغے گئے گولوں یا دیگر ہتھیاروں کی زد میں آ گئے۔

برطانوی میری ٹائم ٹریڈ آپریشنز (یو کے ایم ٹی او) کے مطابق منگل کو پیش آنے والے ان واقعات کی تحقیقات جاری ہیں، تاہم حملوں کی نوعیت اور ذمہ داروں کے بارے میں تاحال تفصیلات سامنے نہیں آئیں۔ حکام نے یہ بھی واضح نہیں کیا کہ دونوں جہازوں کو کتنا نقصان پہنچا اور آیا عملے کا کوئی رکن زخمی ہوا ہے یا نہیں۔

رپورٹ کے مطابق اکتوبر کے آغاز سے آبنائے ہرمز اور اس کے اطراف تجارتی جہازوں پر حملوں میں اضافہ دیکھا گیا ہے۔ 11 اکتوبر کو ایک ہی روز چھ جہازوں کو نشانہ بنائے جانے کی اطلاعات سامنے آئی تھیں، جن میں چار تیل بردار جہاز، ایک کنٹینر بردار جہاز اور عمان کی بندرگاہ صحار کے قریب ایک تیل بردار جہاز شامل تھا۔

اس سے قبل 28 ستمبر سے 5 اکتوبر کے درمیان بھی کم از کم 12 حملوں کی اطلاعات موصول ہوئی تھیں، جس سے خطے میں بحری تجارت اور جہازوں کی حفاظت سے متعلق خدشات مزید بڑھ گئے ہیں۔