آرمی چیف قمر باجوہ کا ایل او سی کے چھمب سیکٹر کا دورہ

راولپنڈی (ڈیلی اردو) آرمی چیف جنرل قمر جاوید باجوہ نے کنٹرول لائن پر چھمب سیکٹر پر اگلے مورچوں کے دورے میں افسروں اور جوانوں سے کہا ہے کہ وہ ثابت قدم رہیں، اپنے فرائض ایمان داری اور جذبے کے ساتھ ادا کریں۔

پاکستان فوج کے شعبہ تعلقات عامہ (آئی ایس پی آر) کے مطابق آرمی چیف کو ایل او سی پر تازہ ترین آپریشنل صورتحال اور بھارت کی سیز فائر معاہدے کی خلاف ورزیوں پر بریفنگ دی گئی۔

آئی ایس پی آر نے بتایا کہ آرمی چیف نے اگلے مورچوں پر تعینات افسروں اور جوانوں سے گفتگو کی اور کنٹرول لائن پر مسلسل نظر رکھنے پر افسروں اور جوانوں کی تعریف بھی کی۔

#COAS visited forward areas at Chamb Sector along LOC. COAS was briefed on latest operational situation including Indian CFVs deliberately targeting local residents living near LOC. Interacting with officers and men, COAS appreciated them for continued vigil and remarkable (1/2) pic.twitter.com/POOqAsntpX

— DG ISPR (@OfficialDGISPR) October 21, 2020

آئی ایس پی آر کا کہنا ہے کہ آرمی چیف نے بہترین آپریشنل تیاریوں پربھی افسروں اور جوانوں کو سراہا۔

آئی ایس پی آر کے مطابق آرمی چیف نے کنٹرول لائن پر بھارتی فائرنگ سے متاثرہ آبادیوں سے تعاون پر زور دیا۔

اس موقع پر انہوں نے کہا کہ ثابت قدم رہیں، اپنے فرائض ایمانداری اور جذبے کے ساتھ ادا کریں۔

خیال رہے کہ بھارتی فوج کی جانب سے لائن آف کنٹرول پر سیز فائر معاہدے کی خلاف ورزیوں کا سلسلہ جاری ہے اور اب تک کئی پاکستانی فوجی اور شہری ہلاک ہوچکے ہیں۔