فیلڈ مارشل عاصم منیر کا ایس ایس جی ہیڈکوارٹرز تربیلا کا دورہ، جدید جنگی تیاریوں اور مقامی دفاعی صلاحیتوں میں اضافے پر زور

تربیلا (ڈیلی اردو) چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر نے کہا ہے کہ بدلتے ہوئے سکیورٹی خطرات اور مستقبل کے جنگی چیلنجز سے مؤثر انداز میں نمٹنے کے لیے مسلسل تربیت، جدید ٹیکنالوجی کے استعمال اور مقامی سطح پر دفاعی صلاحیتوں کو فروغ دینا ناگزیر ہے۔

پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل عاصم منیر نے 5 نومبر کو ہیڈکوارٹرز اسپیشل سروسز گروپ (ایس ایس جی) تربیلا کا دورہ کیا، جہاں پہنچنے پر فارمیشن کے جنرل آفیسر کمانڈنگ نے ان کا استقبال کیا۔ اس موقع پر انہوں نے یادگار شہدا پر پھولوں کی چادر چڑھائی اور فاتحہ خوانی کرتے ہوئے وطن کے دفاع میں جانیں قربان کرنے والے ایس ایس جی اہلکاروں کو خراج عقیدت پیش کیا۔

دورے کے دوران فیلڈ مارشل کو ایس ایس جی کی خصوصی تربیت، آپریشنل تیاریوں، مشن کی تکمیل کے لیے صلاحیتوں اور مستقبل کے تقاضوں کے حوالے سے تفصیلی بریفنگ دی گئی۔ انہوں نے جدید ترین خصوصی عسکری سازوسامان کا معائنہ کیا اور کمانڈوز کی جنگی مہارت، تیز رفتار کارروائیوں اور خصوصی آپریشنز کی صلاحیتوں کا عملی مظاہرہ بھی دیکھا۔

فیلڈ مارشل عاصم منیر نے افسران اور جوانوں سے ملاقات کے دوران ان کے پیشہ ورانہ معیار، بلند حوصلے، نظم و ضبط اور فرائض سے وابستگی کو سراہا۔ انہوں نے زور دیا کہ ایس ایس جی کو بدلتے ہوئے خطرات کے تناظر میں اپنی تربیت اور جنگی صلاحیتوں کا معیار مسلسل بہتر بنانا ہوگا تاکہ ہر قسم کے آپریشنل چیلنجز کا مؤثر مقابلہ کیا جا سکے۔

یہ دورہ ایک ایسے وقت میں ہوا ہے جب پاکستان کی مسلح افواج جدید جنگی تقاضوں، انسداد دہشت گردی اور مقامی دفاعی پیداوار پر توجہ دے رہی ہیں۔ اس سے قبل اگست 2026ء میں فیلڈ مارشل عاصم منیر نے پاکستان آرڈیننس فیکٹریز واہ کا دورہ بھی کیا تھا، جہاں انہیں مقامی سطح پر اسلحہ اور گولہ بارود کی تیاری اور دفاعی پیداوار میں خود انحصاری کے منصوبوں پر بریفنگ دی گئی تھی۔