آپریشن ضرب عضب کے متاثرین کی واپسی کا عمل دوبارہ شروع

پشاور (ڈیلی اردو/آن لائن) پراونشل ڈیزاسٹر مینجمینٹ اتھارٹی خیبر پختونخواہ نے شمالی وزیرستان کے آپریشن ضرب عضب کے متاثرین کی واپسی دوبارہ شروع کرنے کا اعلان کیا ہے جس کے پہلے مرحلے میں میرانشاہ سے متصل ماچس گاں کی 496 متاثرین خاندانوں کی واپسی کا عمل 16 مارچ سے 19 مارچ تک جاری رہے گا۔

پی ڈی ایم اے کے دفتر سے جاری ہو نے والے ایک بیان میں ادارے کے ترجمان نے بتایا ہے کہ ماچس گائوں کے متاثرین بکا خیل کیمپ کے پاس موجود واپسی
مرکز میں رجسٹریشن کریںگے اور رضاکارانہ واپسی فارم پر دستخط کریںگے جس کے بعد روزانہ کی بنیاد پر 150 خاندان واپس بھیجے جائیںگے اور چار دنوں میں ان کی واپسی کا عمل مکمل کیا جائے گا۔ترجمان کے مطابق واپس جانے والے ہر ایک خاندان کو ٹرانسپورٹ کیلئے دس ہزار جبکہ 25 ہزار روپے بطور واپسی امدادکے دیئے جا ئیںگے، اس کے علاوہ پی ڈی ایم اے کی طرف سے ہائی جین کٹ، گھریلو استعمال کی دیگر غیر غذائی اشیا اور چھ ماہ تک اپنے علاقے کے اندر راشن بھی دیا جائے گا۔

ڈائریکٹر جنرل پی ڈی ایم اے پرویز خان ثبت خیل نے ماچس گائوں کے تمام متاثرین خاندانوں کو ہدایت کی ہے کہ وہ اپنی رجسٹریشن بروقت کروائیں اور رضاکارانہ واپسی فارم کو پر کریں جس کیلئے بکا خیل کیمپ کے پاس واپسی مرکز میں پی ڈی ایم اے کا عملہ موجود رہے گا تاکہ واپسی کا عمل بطریق احسن مکمل ہو سکے۔