مردان میں پولیس انسپکٹر پراسرار طور پر لاپتہ، گاڑی رنگ روڈ سے مل گئی، مبینہ اغوا کا خدشہ

مردان (ڈیلی اردو) پاکستان کے صوبہ خیبرپختونخوا کے شورش زدہ ضلع مردان میں پولیس انسپکٹر گلزار خان پراسرار طور پر لاپتہ ہوگئے ہیں، جبکہ ان کی گاڑی تھانہ گڑھی کپورہ کی حدود میں رنگ روڈ پر کھڑی ہوئی ملی ہے۔

ذرائع کے مطابق گلزار خان سابق قائم مقام ڈپٹی سپرنٹنڈنٹ پولیس (ڈی ایس پی) رہ چکے ہیں اور مردان میڈیکل کمپلیکس (ایم ایم سی) اسپتال سے بھی وابستہ ہیں۔ ان کی گاڑی رنگ روڈ سے ملنے کے بعد ان کی گمشدگی کا معاملہ سامنے آیا۔ ان کا موبائل فون مسلسل بند ہونے کے باعث اہل خانہ اور دیگر قریبی افراد کا ان سے رابطہ نہیں ہو پا رہا۔

انسپکٹر گلزار خان کے قریبی ذرائع نے ان کے مبینہ اغوا کا خدشہ ظاہر کیا ہے، تاہم پولیس یا کسی دوسرے متعلقہ ادارے کی جانب سے اغوا کی تصدیق نہیں کی گئی۔ ان کی گمشدگی کی وجوہات اور موجودہ مقام کے حوالے سے بھی تاحال کوئی مصدقہ معلومات سامنے نہیں آسکیں۔

ابتدائی اطلاعات کے مطابق واقعے کا مقدمہ تاحال درج نہیں کیا گیا، جبکہ پولیس نے معاملے کی تحقیقات شروع کردی ہیں۔ پولیس ذرائع کا کہنا ہے کہ انسپکٹر گلزار خان کی گمشدگی کے تمام ممکنہ پہلوؤں کا جائزہ لیا جا رہا ہے۔