اسلام آباد خودکش دھماکے کے بعد پنجاب و سندھ میں سکیورٹی انتہائی سخت

اسلام آباد (ڈیلی اردو) پاکستان کے دارالحکومت میں منگل کے روز ڈسٹرکٹ اینڈ سیشنز کورٹ جی 11 کے باہر ہونے والے خودکش دھماکے کے بعد پنجاب اور سندھ میں سکیورٹی سخت کر دی گئی ہے۔ دھماکے کے نتیجے میں کم از کم 14 افراد ہلاک اور دو درجن سے زائد زخمی ہوئے۔

پنجاب میں ہدایات

محکمہ داخلہ پنجاب نے تمام آر پی اوز، سی پی اوز، ڈی پی آوز، آئی جی پنجاب اور سی سی پی او لاہور کو ہدایت دی ہے کہ صوبے کے حساس، اہم اور گنجان آباد علاقوں میں سکیورٹی بڑھائی جائے۔ کمشنرز، ڈپٹی کمشنرز اور ریسکیو اداروں کو ہائی الرٹ رہنے کا مراسلہ بھی جاری کیا گیا ہے تاکہ انتہا پسندی کے خطرات سے نمٹنے کے لیے مربوط اور فعال اقدامات کیے جا سکیں۔

سندھ میں الرٹ

اسلام آباد دھماکے کے بعد سندھ کے وزیر داخلہ ضیا الحسن لنجار نے صوبے بھر میں پولیس کو الرٹ رہنے کے احکامات جاری کیے ہیں۔ ان کے مطابق داخلی و خارجی پوائنٹس، اہم شاہراہوں اور سڑکوں پر نگرانی اور چیکنگ مزید سخت کی جائے۔

سندھ میں اہم ایونٹس کی سکیورٹی پلانز کا از سرنو جائزہ لینے کی بھی ہدایت دی گئی ہے تاکہ آئندہ دنوں اور مہینوں میں ہونے والے پروگرامز اور اجتماعات میں کسی بھی قسم کے خطرے سے بروقت نمٹا جا سکے۔