افغانستان میں لاشوں کی بےحرمتی ناقابلِ قبول اور انسانیت سوز ہیں، پاکستان

اسلام آباد (ڈیلی اردو) ترجمان دفتر خارجہ شفقت علی خان نے ہفتہ وار بریفنگ کے دوران کہا ہے کہ پاکستان اور افغانستان مسئلے کے پُرامن حل کے لیے تعمیری مذاکرات میں مصروف ہیں۔

انہوں نے کہا کہ پاکستان نے بار بار افغانستان میں فتنۃ الخوارج کی موجودگی کی نشاندہی کی اور 11 تا 15 اکتوبر کے دوران سرحد پر طالبان کے اشتعال انگیز حملوں پر گہری تشویش کا اظہار کیا۔ پاکستان نے اپنے دفاع کے حق کے تحت طالبان کے حملوں کو مؤثر طور پر پسپا کیا۔

ترجمان کے مطابق طالبان فورسز اور ان کے زیر استعمال دہشت گرد ٹھکانوں کو بھاری نقصان پہنچایا گیا، اور جوابی کارروائی شہری آبادی کے خلاف نہیں بلکہ دہشت گرد عناصر کے خلاف تھی۔ کارروائی کے بعد طالبان کی درخواست پر 15 اکتوبر کی شام 6 بجے سے 48 گھنٹوں کی جنگ بندی نافذ کی گئی۔

شفقت علی خان نے کہا کہ پاک افغان سرحد پر فائرنگ اور کشیدگی کے باعث اس وقت تجارتی سرگرمیاں معطل ہیں۔ 

انہوں نے مزید کہا کہ افغانستان میں لاشوں کی بےحرمتی اور تشدد کے واقعات ناقابلِ قبول اور انسانیت سوز ہیں، اور افغان حکام سے مطالبہ کیا ہے کہ وہ ان جرائم میں ملوث عناصر کو انصاف کے کٹہرے میں لائیں۔

انہوں نے پاکستان کی توقع ظاہر کی کہ طالبان حکومت اپنے وعدوں کے مطابق اپنی سرزمین دہشت گردی کے لیے استعمال نہیں ہونے دے گی اور دہشت گرد عناصر کے خلاف ٹھوس اقدامات کرے گی۔

‏پاکستان، کالعدم تحریک طالبان پاکستان (ٹی ٹی پی) سے تعلق رکھنے والے عسکریت پسندوں کیلئے خوارج کی اصطلاح استعمال کرتا ہے۔