امریکا، ایران کیخلاف طاقت کے استعمال سے باز رہے: روسی صدر

ماسکو (ویب ڈیسک) روس نے امریکا کو خبردار کیا ہے کہ وہ ایران کے خلاف طاقت کے استعمال سے باز رہے۔

تفصیلات کے مطابق روسی صدر ولادیمیر پوٹن نے امریکا کو طاقت کے استعمال کے معاملے میں خبردار کیا ہے۔

ماسکو سے جاری ہونے والے بیان میں انھوں نے کہا کہ ایران کے خلاف امریکی کارروائی کے خطے پر انتہائی تباہ کن نتائج مرتب ہوں گے۔

انھوں نے خدشہ ظاہر کیا کہ اس اقدامات سے توازن بگڑ جائے گا اور ہول ناک نتائج سامنے آئیں گے۔

خیال رہے کہ ایران کی جانب سے امریکی ڈرون گرائے جانے پر امریکی صدر ڈونلڈ ٹرمپ نے ردعمل دیتے ہوئے کہا ہے کہ ایران نے امریکی ڈرون گرا کر بہت بڑی غلطی کی۔

واضح رہے کہ ایران نے آج آبنائے ہرمز میں امریکی ڈرون مار گرایا تھا، اس حوالے سے کمانڈر پاسداران انقلاب کا کہنا تھا کہ ہم نے امریکا کو واضح پیغام دیا ہے کہ ہم جنگ نہیں چاہتے پر جنگ کے لیے تیار ہیں۔

خیال رہے کہ گزشتہ ہفتے جاپانی وزیر اعظم نے ایران کا دورہ کیا تھا، جس سے یہ تاثر ملا تھا کہ دونوں ممالک میں برف پگھل رہی ہے. البتہ اس واقعے نے حالات کو پھر کشیدہ کر دیا ہے۔

اسی تناظر میں روس کی جانب یہ اہم پیغام آیا ہے کہ امریکا کو کسی بھی مرحلے پر طاقت کے استعمال سے باز رہنا چاہیے۔