امریکہ نے قطر کے العدید ایئر بیس پر نیا فضائی و میزائل دفاعی سیل قائم کر دیا

واشنگٹن (ڈیلی اردو ) امریکی سینٹرل کمانڈ (سینٹکام) نے اعلان کیا ہے کہ قطر میں واقع العدید ایئر بیس پر فضائی اور میزائل دفاع کے لیے ایک نیا رابطہ کاری سیل قائم کر دیا گیا ہے۔

امریکی سینٹرل کمانڈ کے مطابق یہ نیا سیل امریکا اور اس کے علاقائی شراکت داروں کے اشتراک سے قائم کیا گیا ہے، جو مشترکہ فضائی آپریشنز سینٹر کے اندر کام کرے گا۔ اس سیل کا مقصد فضائی اور میزائل خطرات سے نمٹنے کے لیے رابطہ کاری اور ردعمل کی صلاحیت کو مزید مؤثر بنانا ہے۔

امریکی حکام کا کہنا ہے کہ اس نئے سیل میں امریکا اور مشرقِ وسطیٰ کے مختلف ممالک کے فوجی اہلکار مل کر کام کریں گے، تاکہ کسی بھی ہنگامی صورتحال میں فوری اور مربوط ردعمل کو یقینی بنایا جا سکے۔

حکام کے مطابق نئے سیل کے قیام سے خطے میں امریکی اور اتحادی افواج کے فضائی دفاعی نظام کو مضبوط بنانے میں مدد ملے گی۔

واضح رہے کہ ایران گزشتہ برس قطر میں واقع امریکی فوجی اڈے کو نشانہ بنا چکا ہے، جس کے بعد خطے میں فضائی و میزائل دفاعی اقدامات کی اہمیت مزید بڑھ گئی ہے۔