اٹلی میں حماس فنڈنگ نیٹ ورک پکڑا گیا، 9 ملزمان گرفتار

روم (ڈیلی اردو) اٹلی کی پولیس نے عسکریت پسند تنظیم حماس کے لیے لاکھوں یورو جمع کرنے کے الزام میں 9 افراد کو گرفتار کر لیا ہے۔ پولیس کے مطابق ملزمان نے دو سال سے زائد عرصے کے دوران تقریباً 70 لاکھ یورو اکٹھے کیے۔

حکام کا کہنا ہے کہ یہ رقوم بظاہر فلسطینی شہریوں کے لیے انسانی امداد کے نام پر جمع کی گئیں، تاہم تحقیقات سے معلوم ہوا کہ ایک پیچیدہ اور منظم فنڈ ریزنگ نیٹ ورک کے ذریعے یہ رقم درحقیقت حماس تک منتقل کی جا رہی تھی۔

پولیس نے کارروائی کے دوران گرفتار افراد کے تقریباً 80 لاکھ یورو مالیت کے اثاثے بھی ضبط کر لیے ہیں۔ ان افراد پر دہشت گردی کی سرگرمیوں کے لیے مالی معاونت فراہم کرنے کے الزامات عائد کیے گئے ہیں۔

یہ کارروائی اٹلی کی انسدادِ دہشت گردی پولیس اور مالیاتی پولیس کے مشترکہ آپریشن کے تحت کی گئی۔ حکام کے مطابق اس تفتیش کا آغاز 7 اکتوبر 2023 کو جنوبی اسرائیل میں حماس کے حملے کے بعد ہوا تھا۔

تحقیقات کے دوران مشکوک مالی لین دین کی متعدد رپورٹس کا تجزیہ کیا گیا، جس سے شمالی شہر جینوا میں قائم ایک منظم فنڈ ریزنگ نظام کا انکشاف ہوا۔ 

پولیس کے مطابق جمع کی گئی رقوم میں سے 71 فیصد سے زائد رقم براہِ راست حماس کے عسکری ونگ کو منتقل کی گئی، جسے خودکش حملہ آوروں اور دہشت گردی کے الزامات میں گرفتار افراد کے خاندانوں کی مالی مدد کے لیے استعمال کیا گیا۔