اپردیر: سیکورٹی فورسز کے قافلے پر حملے کی کوشش، 15 دہشتگرد ہلاک

اپر دیر(ڈیلی اردو) بریکوٹ کے علاقے میں پولیس اور سکیورٹی فورسز نے مشترکہ کارروائی کرتے ہوئے دہشتگردوں کی جانب سے قافلے پر حملے کی کوشش ناکام بنا دی، جوابی کارروائی میں 15 دہشتگرد ہلاک جبکہ متعدد زخمی ہوگئے۔

ذرائع کے مطابق پولیس اور سکیورٹی فورسز کا مشترکہ قافلہ دوبانڈو چیک پوسٹ کی طرف جا رہا تھا کہ بریکوٹ گاؤں کے قریب دہشتگردوں نے قافلے کو نشانہ بنانے کی کوشش کی۔

سکیورٹی اہلکاروں نے فوری جوابی کارروائی کرتے ہوئے حملہ آوروں کو نشانہ بنایا، جس کے نتیجے میں 15 دہشتگرد ہلاک اور متعدد زخمی ہوگئے۔

واقعے کے بعد سکیورٹی فورسز نے علاقے کو گھیرے میں لے کر سرچ اور کلیئرنس آپریشن شروع کردیا، جبکہ مشتبہ مقامات کی تلاشی اور مزید کارروائی جاری ہے۔