ایران: خاتون کے گینگ ریپ میں ملوث پانچ مجرموں کو پھانسی پر لٹکا دیا گیا

تہران (ڈیلی اردو/اے ایف پی)اسلامی جمہوریہ ایران میں پانچ افراد کو پھانسی دے دی گئی ہے۔ ایرانی عدالت کے مطابق گزشتہ سال ملک کے شمال مغرب میں ان پانچوں ملزمان نے ایک خاتون کو اجتماعی جنسی زیادتی کا نشانہ بنایا تھا۔

ایرانی عدلیہ کی ویب سائٹ ‘میزان پر شائع ہونے والی تفصیلات میں بتایا گیا ہے کہ ان مجرمان نے مئی 2022ء کے دوران ایک خاتون کو ایرانی شہر مرند سے اغوا کیا اور پھر متاثرہ خاتون کو اجتماعی جنسی زیادتی کا نشانہ بنایا تھا۔

ویب سائٹ میزان کے مطابق خاتون کے ساتھ جنسی زیادتی کے اس واقعے کے ٹھیک چار روز بعد ایک ملزم کو ملک کے مشرقی صوبے آذربائیجان سے گرفتار کیا گیا تھا، جہاں وہ کئی دیگر جرائم میں بھی ملوث تھا۔

گزشتہ ماہ ایران میں ان تین افراد کو بھی‌پھانسی دے دی گئی تھی، جنہوں نے ایک خاتون کو جعلی کاسمیٹک سرجری کلینک میں لے جا کر بے ہوش کیا اور پھر اس کے ساتھ جنسی زیادتی کی تھی۔ میزان کے مطابق یہ افراد ایرانی صوبے حرمزگان میں بھی سال 2021ء کے دوران خواتین پر جنسی حملے کرنے کی سازشوں میں ملوث رہے تھے۔

انسانی حقوق کی علمبردار تنظیم ایمنسٹی انٹرنیشنل کے مطابق حالیہ کچھ عرصے کے دوران ایران میں پھانسی کے رجحان میں واضح اضافہ ہوا ہے۔ گزشتہ سال چین کے بعد ایران میں سب سے زیادہ پھانسی کی سزاؤں پرعمل درآمد کیا گیا تھا۔ ایران میں سال 2022 ء کے دوران کم از کم 582 افراد کو تختہ دار پر لٹکایا گیا تھا۔

ایمنسٹی انٹرنیشنل نے تنقید کرتے ہوئے کہا ہے کہ رواں برس بھی تہران حکومت اب تک کم از کم 282 افراد کو پھانسی دے چکی ہے۔ یہ تعداد گزشتہ سال جون تک دی جانے والی پھانسی کی سزاؤں سے تقریبا دوگنا زیادہ ہے۔