ایران پر اسلحہ کی پابندی ختم ہوئی تو تنازعات میں شدت آئے گی: امریکا

لندن (ڈیلی اردو) امریکا کے خصوصی ایلچی برائن ہُک نے خبردار کیا ہے کہ اگر ایران پر اسلحہ کی پابندی ختم ہوئی تو شام اور دوسرے ملکوں میں جاری تنازعات میں شدت آئے گی۔

خیال رہے کہ ایران پر عائد یہ پابندی رواں سال اکتوبر میں ختم ہو رہی ہے۔ امریکا عالمی برادری سے مطالبہ کر رہا ہے کہ وہ ایران پر ہتھیاروں کی خرید وفروخت پر پابندی میں توسیع کی حمایت کرے۔

برائن ہُک کا ایک بیان میں کہنا تھا کہ ایران پر اسلحہ کی پابندی کی میعاد میں توسیع نہیں کی جاتی تو اس سے مشرقِ اوسط میں امن اور سلامتی کو شدید نقصان پہنچے گا۔

خیال رہے کہ امریکی وزیر مائیک پومپیو متعدد بار کہہ چکے ہیں کہ ایران کو روایتی ہتھیاروں کی خرید وفروخت کرنے کی اجازت نہیں ہونی چاہیے۔ وہ یورپی یونین سے بھی یہ مطالبہ کر چکے ہیں کہ وہ ایران کے میزائل پروگرام پر کام کرنے والے افراد اور اداروں پر پابندیاں عائد کرے۔