ایران کو غزہ اور لبنان جیسی کاروائی کا سامنا کرنا پڑ سکتاہے، اسرائیلی وزیردفاع کا سخت انتباہ

تل ابیب(ڈیلی اردو ) اسرائیل نے ایران کو سخت انتباہ جاری کرتے ہوئے کہا ہے کہ تہران اگر خطے میں عسکری گروہوں کی پشت پناہی سے باز نہ آیا تو اسے بھی ویسی ہی کارروائی کا سامنا کرنا پڑ سکتا ہے جیسی غزہ میں حماس اور لبنان میں حزب اللہ کے خلاف کی گئی۔

اسرائیلی وزیر دفاع یوآف گیلنٹ نے کہا کہ ایران نہ صرف یمن میں سرگرم حوثیوں کو اسلحہ اور مالی امداد فراہم کر رہا ہے بلکہ انہیں اسرائیل کے خلاف استعمال بھی کر رہا ہے۔ انہوں نے خبردار کیا کہ اگر ایران اپنی پالیسیوں سے باز نہ آیا تو تل ابیب اس کے خلاف سخت قدم اٹھانے سے گریز نہیں کرے گا۔

یہ بیان ایک ایسے وقت میں سامنے آیا ہے جب حالیہ دنوں میں ایران نواز حوثی گروہ نے اسرائیل کے بین گوریون انٹرنیشنل ایئرپورٹ کو نشانہ بنایا، جس سے ہوائی اڈے کو جزوی نقصان پہنچا۔ جوابی طور پر اسرائیلی فضائیہ نے صنعاء کے ہوائی اڈے اور ارد گرد کے علاقوں میں بجلی گھروں پر حملے کیے۔

وزیر دفاع نے ایران کو مخاطب کرتے ہوئے کہا، ’’جس طرح ہم نے بیروت میں حزب اللہ، غزہ میں حماس اور دمشق میں اسد حکومت کے خلاف کارروائیاں کیں، ویسا ہی انجام تہران کے لیے بھی ممکن ہے۔‘‘

یاد رہے کہ ایران کی حمایت یافتہ تنظیموں کو مشرق وسطیٰ میں “مزاحمتی اتحاد” کہا جاتا ہے، جن میں حزب اللہ، حماس اور حوثی باغی شامل ہیں۔ ان گروہوں کو امریکہ اور اسرائیل کی پالیسیوں کے خلاف متحرک تصور کیا جاتا ہے۔

سات اکتوبر 2023 کے حملے کے بعد اسرائیل نے حماس کے خلاف غزہ میں بڑی کارروائی کی، جبکہ حزب اللہ کے ساتھ جھڑپوں کے بعد نومبر میں ایک عارضی جنگ بندی طے پائی۔ اس دوران اسرائیلی افواج نے دونوں گروہوں کو شدید نقصان پہنچایا۔

تازہ ترین کشیدگی اس وقت بڑھی جب حوثیوں نے تل ابیب کے قریب حملہ کیا، جسے غزہ میں فلسطینیوں کے ساتھ اظہار یکجہتی کے طور پر پیش کیا گیا۔ اگرچہ ایران نے ان حملوں میں کسی براہ راست کردار کی تردید کی ہے، تاہم اسرائیل کا مؤقف ہے کہ یہ تمام کارروائیاں ایران کی سرپرستی میں ہو رہی ہیں۔