ایران کے یو اے ای پر 2 بیلسٹک میزائلوں سے حملہ، سیکیورٹی الرٹ جاری

دبئی (ڈیلی اردو) متحدہ عرب امارات کی وزارت دفاع نے دعویٰ کیا ہے کہ ایران کی جانب سے یو اے ای کی سمت 2 بیلسٹک میزائل داغے گئے، جن میں سے ایک سمندر میں جبکہ دوسرا ساحل کے قریب زمین پر گرا۔

اماراتی وزارت دفاع کے مطابق فضائی دفاعی نظام نے ایران سے متحدہ عرب امارات کی جانب آنے والے دونوں میزائلوں کی نشاندہی کی۔ حکام کا کہنا ہے کہ میزائلوں کے گرنے سے کسی قسم کا جانی یا مالی نقصان نہیں ہوا۔

اماراتی حکام نے یہ واضح نہیں کیا کہ میزائلوں کو فضائی دفاعی نظام نے راستے میں تباہ کیا یا وہ اپنے ہدف تک پہنچنے سے پہلے ہی سمندر اور ساحلی علاقے میں جا گرے۔

میزائل خطرے کے پیش نظر متحدہ عرب امارات میں شہریوں کے لیے سیکیورٹی الرٹ بھی جاری کیا گیا، جس میں لوگوں کو احتیاط برتنے اور متعلقہ حکام کی ہدایات پر عمل کرنے کی ہدایت کی گئی۔

وزارت دفاع کا کہنا ہے کہ ملک کی مسلح افواج ہائی الرٹ پر ہیں اور قومی خودمختاری، سلامتی اور استحکام کو درپیش کسی بھی خطرے سے نمٹنے کے لیے تیار ہیں۔

دوسری جانب ایران کی طرف سے تاحال ان میزائلوں سے متعلق کوئی باضابطہ ردعمل سامنے نہیں آیا۔

واضح رہے کہ 13 اگست کو بھی متحدہ عرب امارات نے آبنائے ہرمز سے گزرنے والے ابوظہبی نیشنل آئل کمپنی کے 2 تیل بردار بحری جہازوں کو ایران کی جانب سے نشانہ بنائے جانے کا الزام عائد کیا تھا۔ اگلے روز یو اے ای نے ایک اور بحری جہاز کو نشانہ بنائے جانے کا دعویٰ کرتے ہوئے ایران سے آبنائے ہرمز میں حملے روکنے اور بحری گزرگاہ کو مکمل طور پر کھولنے کا مطالبہ کیا تھا۔