باجوڑ میں سیکیورٹی فورسز کا آپریشن، 22 ٹی ٹی پی دہشت گرد ہلاک

خار (نمائندہ ڈیلی اردو) پاکستان کے شورش زدہ صوبے خیبر پختونخوا کے قبائلی ضلع باجوڑ میں سیکیورٹی فورسز نے خفیہ معلومات کی بنیاد پر ہونے والی کارروائی میں کالعدم تحریک طالبان پاکستان (ٹی ٹی پی) کے 22 دہشت گردوں کو ہلاک کر دیا ہے۔

سیکیورٹی ذرائع کے مطابق کارروائی گزشتہ شب گاؤں گدار میں کی گئی، جہاں بڑی تعداد میں ٹی ٹی پی دہشت گردوں کی موجودگی کی مصدقہ اطلاع موصول ہوئی تھی۔ فورسز نے مربوط انٹیلی جنس اور پیشگی پلاننگ کی بنیاد پر ٹارگٹڈ آپریشن کیا، جس کے دوران دہشت گردوں کے ٹھکانے کو گھیرے میں لے کر کارروائی مکمل کی گئی۔

ذرائع کے مطابق قبائلی عمائدین اور مقامی آبادی کے تعاون سے آپریشن سے قبل گاؤں کو خالی کرایا گیا تھا، جس سے علاقے میں کوئی سویلین نقصان نہیں ہوا۔ آپریشن کے وقت ہدف کے اطراف کے تمام مکانات خالی تھے۔

سیکیورٹی فورسز کا کہنا ہے کہ یہ آپریشن دہشت گردی کے نیٹ ورک کے مکمل خاتمے اور علاقے میں دیرپا امن کے قیام کے لیے کیا گیا ہے۔ فورسز کے مطابق آخری دہشت گرد کے خاتمے تک ایسے اقدامات جاری رہیں گے۔

مقامی عمائدین اور عوام نے فورسز کے ساتھ تعاون جاری رکھنے کے عزم کا اظہار کیا ہے، جبکہ سیکیورٹی اداروں کا کہنا ہے کہ عوامی حمایت سے انسداد دہشت گردی کی کوششوں کو مزید تقویت ملی ہے۔