باجوڑ میں سی ٹی ڈی کی کارروائی، افغان خودکش بمبار اور سہولت کار گرفتار

خار (نمائندہ ڈیلی اردو) پاکستان کے شورش زدہ صوبے خیبر پختونخوا کے قبائلی ضلع باجوڑ میں کاؤنٹر ٹیررازم ڈیپارٹمنٹ (سی ٹی ڈی) نے ایلیٹ فورس اور مقامی پولیس کے تعاون سے کارروائی کرتے ہوئے افغان خودکش حملہ آور کو سہولت کار سمیت گرفتار کر لیا۔

سی ٹی ڈی سوات، ایلیٹ فورس کے جوان اور باجوڑ پولیس نے علاقے میں سرچ اینڈ سٹرائیک آپریشن کے دوران دو مشکوک افراد کی موجودگی کی اطلاع پر خشک نالے کے قریب کارروائی کی۔ پولیس کے مطابق دونوں افراد نے پولیس کو دیکھتے ہی روپوش ہونے کی کوشش کی، تاہم بھرپور حکمت عملی سے انہیں گرفتار کر لیا گیا۔

ابتدائی تفتیش میں معلوم ہوا کہ افغان صوبہ بلخ سے تعلق رکھنے والا قیس خودکش حملے کے لیے پاکستان آیا تھا اور وہ اپنے سہولت کار رفیع اللہ کے ساتھ موجود تھا۔ دونوں کے قبضے سے 3 دستی بم برآمد ہوئے جبکہ خودکش بمبار کے پاس سے نیلے تھیلے میں لپٹی دیسی آئی ای ڈی، فیوز اور بارود بھی برآمد ہوا۔

سی ٹی ڈی کے مطابق گرفتار دہشتگرد بڑی کارروائی کی منصوبہ بندی کر رہے تھے اور تفتیش جاری ہے تاکہ دیگر ممکنہ ساتھیوں تک رسائی حاصل کی جا سکے۔