بحیرۂ احمر : سعودی بحری جہاز پر حوثی باغیوں کا بیلسٹک میزائل حملہ

صنعاء(ڈیلی اردو) سعودی عرب کی قومی شپنگ کمپنی بحری نے تصدیق کی ہے کہ اس کا امزن نامی جہاز بحیرۂ احمر میں ایک حملے کی زد میں آیا ہے، تاہم کمپنی کے مطابق جہاز پر موجود تمام عملہ محفوظ ہے اور کسی کے زخمی ہونے کی اطلاع نہیں ملی۔

کمپنی کی جانب سے جاری بیان میں واقعے کی مزید تفصیلات فراہم نہیں کی گئیں۔ اس سے قبل یمن کے ایران نواز حوثی باغیوں نے دعویٰ کیا تھا کہ انہوں نے سعودی ملکیت والے آئل ٹینکر امزن کو بیلسٹک میزائل سے نشانہ بنایا۔

حوثی باغیوں کے فوجی ترجمان کے مطابق جہاز کو سعودی شہر ینبع کے ساحل کے قریب حملے کا نشانہ بنایا گیا اور ان کے بقول میزائل براہِ راست جہاز سے ٹکرایا، جس کے نتیجے میں آگ بھڑک اٹھی۔

تاہم سعودی حکام کی جانب سے حوثی باغیوں کے ان دعوؤں کی مکمل تصدیق نہیں کی گئی۔ دوسری جانب برطانیہ کی میری ٹائم ٹریڈ آپریشنز ایجنسی نے بتایا کہ ینبع سے تقریباً 63 ناٹیکل میل مغرب میں ایک ٹینکر کسی نامعلوم شے کے حملے کی زد میں آیا، تاہم ایجنسی نے حملے میں استعمال ہونے والے ہتھیار کی نوعیت نہیں بتائی۔

واقعے کے بعد بحیرۂ احمر میں تجارتی جہازوں کی سلامتی اور خطے میں بحری آمدورفت کو درپیش خطرات ایک بار پھر نمایاں ہوگئے ہیں۔