بلوچستان: آواران میں دہشت گردی کے خلاف آپریشن کے دوران 2 فوجی اہلکار اور 2 دہشت گرد ہلاک

راولپنڈی (ڈیلی اردو/بی بی سی) صوبہ بلوچستان کے ضلع آواران کے علاقے کھوڑو میں سکیورٹی فورسز اور دہشت گردوں کے درمیان فائرنگ کا تبادلہ ہوا جس میں دو دہشت گرد ہلاک اور دو زحمی ہو گئے جبکہ شدید فائرنگ کے تبادلے کے دوران فوجی اہلکار بھی ہلاک ہو گئے۔

بلوچستان کے ضلع آواران کے علاقے جاہو میں دہشت گردوں کے حملے میں پاک فوج کے صوبیدار آصف اور سپاہی عرفان ہلاک ہوگئے۔#Jaho #Awaran #Balochistan #Pakistan

— Shabbir Hussain Turi (@ShabbirTuri) October 29, 2023

آئی ایس پی آر کے بیان کے مطابق ’فوجی اہلکاروں نے مؤثر طریقے سے دہشت گردوں کے ٹھکانے کا پتہ لگایا اور دو دہشت گردوں کو ہلاک کر دیا گیا جبکہ دو دہشت گرد زخمی ہو گئے۔‘

آئی ایس پی آر کے مطابق ’اس دوران شدید فائرنگ کے تبادلے کے دوران 37 سالہ نائب صوبیدار آصف عرفان اور 22 سالہ سپاہی عرفان علی نے بہادری سے لڑتے ہوئے جان دے دی۔‘

بیان کے مطابق آئی ایس پی آر کا کہنا ہے کہ ’علاقے میں دہشت گردوں کے خاتمے کیلئے سرچ آپریشن کیا جا رہا ہے۔ سکیورٹی فورسز دہشت گردی کو ختم کرنے کے لیے پرعزم ہیں اور ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں‘

مسلح افواج کے دو جوانوں کی ہلاکت پر گہرا دکھ اور افسوس ہے، سرفراز احمد بگٹی

نگران وزیر داخلہ سرفراز احمد بگٹی نے آواران میں دہشت گردوں کے ساتھ فائرنگ کے تبادلے میں مسلح افواج کے دو جوانوں کی ہلاکت پر گہرے دکھ اور افسوس کا اظہار کیا ہے۔

وزیر داخلہ سرفراز بگٹی کے بیان کےمطابق جوانوں نے بہادری سے لڑتے ہوئے جان دی۔

انھوں نے کہا کہ ’مسلح افواج کی جرات اور بلند حوصلے کو سلام پیش کرتے ہیں۔ ان کی قربانیاں رائیگاں نہیں جائیں گی۔

سرفراز احمد بگٹی کے مطابق ’وطن عزیز کو دہشت گردوں سے پاک کرکے دم لیں گے۔‘