بلوچستان: زیارت میں قائداعظم ریزیڈنسی حملہ کیس کے تمام ملزمان بری

کوئٹہ (ڈیلی اردو) انسداد دہشت گردی عدالت نے زیارت ریزیڈینسی حملہ کیس کے تمام ملزمان کو عدم ثبوت پر بری کردیا ہے۔

تفصیلات کے مطابق کوئٹہ میں انسداد دہشت گردی کی خصوصی عدالت نے زیارت میں قائداعظم محمد علی جناح ریزیڈنسی حملہ کیس کی سماعت کی، فریقین کے دلائل سنننے کے بعد عدالت نے تمام گرفتار ملزمان کو عدم ثبوت کی بنا پر باعزت بری کردیا۔

کیس میں حربیار مری سمیت تینتیس ملزموں پر فرد جرم عائد کی گئی تھی جب کہ ناصر مری نامی ایک ملزم 2015 میں دوران علاج دم توڑ گیا تھا۔

واضح رہے کہ دوہزار تیرہ میں زیارت میں شر پسندوں نے قائداعظم محمد علی جناح کی قیام گاہ ’زیارت ریزیڈنسی‘ میں گھس کر وہاں مختلف حصوں میں بم نصب کرکے اسے تباہ کرنے کی کوشش کی، دھماکوں کے نتیجے میں عمارت میں آگ لگ گئی جب کہ شرپسندوں نے ’ریزیڈنسی‘ میں ڈیوٹی پر تعینات پولیس اہلکار کو بھی فائرنگ کر کے شہید کردیا۔