بلوچستان: قلات میں تخریب کاری کا بڑا منصوبہ ناکام، 40 کلو گرام بارود برآمد

کوئٹہ (نمائندہ ڈیلی اردو) پاکستانی سکیورٹی فورسز نے شورش زدہ صوبے بلوچستان کے ضلع قلات کے علاقے کوہک میں کارروائی کرتے ہوئے دہشت گردی کا بڑا منصوبہ ناکام بنا دیا۔

ذرائع کے مطابق فورسز کو خفیہ اطلاع ملی تھی جس پر بروقت کارروائی کی گئی۔ کارروائی کے دوران تقریباً 40 کلو گرام بارودی مواد برآمد کیا گیا جسے بعد ازاں بم ڈسپوزل ٹیم نے محفوظ طریقے سے ناکارہ بنا دیا۔

ذرائع کا کہنا ہے کہ برآمد ہونے والا بارودی مواد بیٹری، تقریباً 20 میٹر تار اور ایس ٹی او ایس ڈیوائس کے ساتھ منسلک تھا۔ 

حکام کے مطابق یہ مواد ممکنہ طور پر کسی بڑی تخریبی کارروائی کے لیے تیار کیا گیا تھا۔

واقعے کے بعد علاقے میں سکیورٹی مزید سخت کر دی گئی ہے جبکہ مزید تفتیش جاری ہے۔ سرکاری سطح پر تاحال باضابطہ بیان جاری نہیں کیا گیا۔