بلوچستان میں دہشت گردی کی لہر: کوئٹہ میں یکے بعد دیگرے چار بم دھماکے

کوئٹہ (ڈیلی اردو) پاکستان کے شورش زدہ صوبے بلوچستان کے دارالحکومت کوئٹہ کے علاقے سریاب میں سنیچر کے روز یکے بعد دیگرے چار بم دھماکے ہوئے، تاہم ان میں کوئی جانی نقصان نہیں ہوا۔

پولیس حکام کے مطابق ایک دھماکا کیچی میں اس وقت ہوا جب نامعلوم مسلح افراد نے پولیس کی موبائل وین پر دستی بم پھینکا۔ ڈی ایس پی سریاب آصف غفور نے بتایا کہ حملے میں کوئی جانی نقصان نہیں ہوا۔

اس سے قبل میر منیر احمد مینگل روڈ پر ریلوے ٹریک کے ساتھ دھماکہ ہوا۔ پولیس کے مطابق نامعلوم افراد نے پٹڑی کے قریب دھماکہ خیز مواد نصب کیا تھا جس کے پھٹنے سے ٹریک کا تقریباً ڈیڑھ سے دو فٹ حصہ متاثر ہوا۔

صبح سریاب کے قمبرانی روڈ پر بھی دو دھماکے ہوئے۔ پولیس حکام کے مطابق ایک دھماکا دستی بم حملے کا نتیجہ تھا، جبکہ دوسرا دھماکا ایک موٹر سائیکل میں نصب دیسی ساختہ بم (آئی ای ڈی) کے ذریعے کیا گیا۔

پولیس نے بتایا کہ آئی ای ڈی دھماکے کے ذریعے بم ڈسپوزل اسکواڈ کی ٹیم کو نشانہ بنانے کی کوشش کی گئی، تاہم ٹیم محفوظ رہی۔ موٹر سائیکل میں نصب بم کو ریموٹ کنٹرول کے ذریعے دھماکے سے اڑایا گیا۔

ڈیلی اردو کے مطابق پہلا دھماکا اس وقت ہوا جب موٹر سائیکل سوار ملزمان نے قمبرانی روڈ پر پولیس چیک پوسٹ پر دستی بم پھینکا۔ کچھ دیر بعد اسی مقام کی جانب جانے والی سی ٹی ڈی کی گاڑی کو آئی ای ڈی کے ذریعے نشانہ بنانے کی کوشش کی گئی، لیکن گاڑی محفوظ رہی اور تمام اہلکار خیریت سے ہیں۔

بلوچستان میں حالیہ مہینوں کے دوران سیکیورٹی صورتحال مزید خراب ہوئی ہے اور شدت پسندوں نے حملوں کی تعداد اور شدت میں اضافہ کیا ہے۔

گزشتہ روز بلوچستان کے مختلف علاقوں میں 3 دھماکے ہوئے۔ ضلع کچھی کے مچھ ٹاؤن میں ایک دھماکے میں ایک شخص زخمی ہوا، جبکہ دو دھماکے مستونگ کے میجر چوک میں ہوئے، جس کے بعد مسلح افراد اور سیکیورٹی فورسز کے درمیان فائرنگ کا تبادلہ بھی ہوا۔

اسی ہفتے جعفر ایکسپریس بھی بولان پاس کے علاقے سے گزرتے ہوئے مسلح حملے سے محفوظ رہی۔ یہ واقعہ گزشتہ ڈیڑھ ماہ کے دوران ٹرین پر ہونے والا چھٹا حملہ تھا۔

30 ستمبر کو کوئٹہ میں ایف سی ہیڈ کوارٹر کے قریب گلی میں ہونے والے دھماکے میں 10 افراد ہلاک اور 33 زخمی ہوئے تھے۔