بلوچستان میں سکیورٹی فورسز کی کارروائیاں، 3 کمانڈروں سمیت 11 دہشت گرد گرفتار

کوئٹہ (ڈیلی اردو رپورٹ) پاکستان کے صوبے بلوچستان کے سرحدی شہر چمن میں سکیورٹی فورسز نے خفیہ آپریشن کے دوران فتنہ الخوارج کی نئی تشکیل کی دراندازی کی کوشش کو ناکام بناتے ہوئے 11 دہشت گردوں کو گرفتار کر لیا۔ گرفتار ہونے والوں میں تنظیم کے اہم کمانڈرز بھی شامل ہیں۔

پاکستان ،کالعدم تحریک طالبان پاکستان (ٹی ٹی پی) سے تعلق رکھنے والے عسکریت پسندوں کے لیے خوارج کی اصطلاح استعمال کرتا ہے، جو کہ اس تنظیم کے شدت پسندانہ ایجنڈے کو ظاہر کرتی ہے۔

سکیورٹی ذرائع کے مطابق، یہ دہشت گرد افغانستان کے سپن بولدک علاقے سے چمن بارڈر کے ذریعے پاکستان میں داخل ہو رہے تھے۔ فورسز کو خفیہ اطلاع ملی تھی کہ ان دہشت گردوں کا مقصد بلوچستان کے مختلف علاقوں میں تخریبی کارروائیاں کرنا تھا۔ سکیورٹی فورسز نے گھات لگا کر کامیاب کارروائی کی اور تمام دہشت گردوں کو گرفتار کر لیا۔

گرفتار ہونے والے دہشت گردوں میں حافظ گل بہادر گروپ کے اہم رکن احمد ولی عرف داداللہ اور حزب گروپ کے کمانڈر حزیفہ کا قریبی ساتھی شوکت عرف آغا جان شامل ہیں۔ اس نئی تشکیل کی قیادت نصیب اللہ کر رہا تھا۔

ذرائع کے مطابق یہ دہشت گرد چمن، کوئٹہ اور پشین کے علاقوں میں تخریبی کارروائیوں کے لیے تیار کیے گئے تھے۔ گرفتار دہشت گردوں کو تفتیش کے لیے نامعلوم مقام پر منتقل کر دیا گیا ہے اور اس سلسلے میں مزید تحقیقات جاری ہیں۔