بلوچستان میں کالعدم بی آر اے کے کمانڈر سمیت 100 علیحدگی پسندوں نے ہتھیار ڈال دیے

کوئٹہ (ڈیلی اردو) پاکستان کے شورش زدہ صوبے بلوچستان کے ضلع ڈیرہ بگٹی کی تحصیل سوئی میں کالعدم بلوچستان لبریشن آرمی (بی آر اے) کے کمانڈر وڈیرہ نور علی چاکرانی سمیت ایک سو سے زائد علیحدگی پسندوں نے ریاست پاکستان کے سامنے ہتھیار ڈال دیے۔ 

وڈیرہ نور علی چاکرانی اور ان کے ساتھیوں نے بھاری مقدار میں اسلحہ اور گولہ بارود پاکستان ہاؤس میں کئیر ٹیکر میر آفتاب احمد بگٹی اور ڈپٹی کمشنر ڈیرہ بگٹی کے حوالے کیا۔ سرینڈر کے موقع پر مقامی معززین، قبائلی عمائدین اور میڈیا نمائندگان بھی موجود تھے۔ 

حکام کے مطابق نیشنلسٹ مسلح گروہ بلوچستان لبریشن آرمی (بی آر اے) سے تعلق رکھنے والے شرپسندوں نے سرینڈر کے لیے جاتے ہوئے نور علی چاکرانی اور ان کے ساتھیوں کی گاڑیوں پر حملہ بھی کیا تاہم وہ محفوظ رہے اور بعد ازاں پاکستان کا جھنڈا تھام کر ریاست سے وفاداری کا حلف اٹھایا۔ وڈیرہ نور علی چاکرانی نے نہ صرف علیحدگی کی مسلح کارروائیوں سے دستبرداری کا اعلان کیا بلکہ بی آر اے کے خلاف "چاکرانی امن فورس" کے قیام کا بھی اعلان کیا، جسے حکام موجودہ سیکیورٹی صورتحال میں ایک اہم پیش رفت قرار دے رہے ہیں۔ 

سیکیورٹی حکام کا کہنا ہے کہ بلوچستان میں ریاست مخالف گروہوں کے خلاف انٹیلیجنس بیسڈ آپریشنز اور انسداد دہشت گردی حکمت عملی کے نتیجے میں عسکریت پسندوں کا ہتھیار ڈالنا تیز ہو رہا ہے اور یہ رجحان امن و استحکام کی بحالی کے لیے مثبت اشارہ ہے۔ 

وزیراعلیٰ بلوچستان میر سرفراز بگٹی نے سرینڈر کرنے والے افراد کو قومی دھارے میں شامل ہونے پر مبارک باد دیتے ہوئے کہا کہ سوئی میں نور علی چاکرانی اور سو سے زائد ساتھیوں کا ہتھیار پھینک کر قومی پرچم اٹھانا اس بات کی علامت ہے کہ ریاست نے مذاکرات کے دروازے بند نہیں کیے اور آئین پاکستان تسلیم کرنے والوں کو ہمیشہ گلے لگایا جائے گا۔ 

ان کا کہنا تھا کہ جو ریاست کی نرمی کو کمزوری سمجھے گا اس کا پیچھا آخری دم تک کیا جائے گا جبکہ ریاست مخالف عناصر کے خلاف کارروائیاں جاری رہیں گی۔