بلوچستان: نوشکی میں مسلح حملے میں دو پولیس اہلکار ہلاک

کوئٹہ (ڈیلی اردو) پاکستان کے شورش زدہ صوبے بلوچستان کے ضلع نوشکی میں نامعلوم مسلح افراد کے حملے میں دو پولیس اہلکار ہلاک ہو گئے ہیں۔

پولیس حکام کے مطابق واقعہ نوشکی شہر کے مغربی بائی پاس علاقے میں پیش آیا۔ نوشکی پولیس کے اہلکار غلام محمد نے فون پر بتایا کہ ہلاک ہونے والے اہلکار عبدالرازق اور عبیداللہ قیدیوں کی ڈیوٹی کے حوالے سے پولیس لائن جا رہے تھے کہ نامعلوم مسلح افراد نے ان پر اچانک حملہ کر دیا۔

پولیس کا کہنا ہے کہ حملے کے دوران دونوں اہلکار جان کی بازی ہار گئے اور ان کی لاشیں پوسٹ مارٹم کے لیے ٹیچنگ ہسپتال نوشکی منتقل کر دی گئی ہیں۔ حملہ آوروں نے دونوں اہلکاروں کا اسلحہ بھی اپنے ساتھ لے گئے۔

نوشکی پولیس کے ایس ایچ او ظہیر بلوچ نے واقعے کی تحقیقات کا آغاز کر دیا ہے۔

ضلع نوشکی بلوچستان کے دارالحکومت کوئٹہ سے مشرق میں تقریباً 135 کلومیٹر دور واقع ہے اور شمال میں افغانستان کی سرحد سے ملتی ہے۔ بلوچستان میں حالیہ برسوں میں سکیورٹی اہلکاروں کے خلاف حملوں اور دیگر بدامنی کے واقعات میں کمی و بیشی کے ساتھ اضافہ ہوتا رہا ہے۔