بلوچستان: کچھی میں علیحدگی پسندوں نے 7 مزدوروں کو اغوا کر لیا

کوئٹہ (ڈیلی اردو/بی بی سی ) پاکستان کے صوبہ بلوچستان کے ضلع کچھی کے علاقے شوران سے بلوچ علیحدگی پسندوں نے سات مزدوروں کو اغوا کرلیا ہے۔

مقامی لیویز فورس کے ایس ایچ او عبدالحئی نے برطانوی خبر رساں ادارے بی بی سی کو بتایا کہ مغوی مزدور شوران کے مقام پر ایک ڈیم پر کام کررہے تھے۔

ان کا کہنا تھا کہ گذشتہ شب وہاں نامعلوم مسلح افراد آئے اور وہاں ایک ڈمپر گاڑی کو نذرآتش کرنے کے علاوہ کھدائی کرنے والی مشین سمیت دو گاڑیوں پر فائرنگ کرکے ان کو نقصان پہنچایا۔

ان کا کہنا تھا کہ اغوا کار فرار ہوتے ہوئے ڈیم پر کام کرنے والے سات مزدوروں کو اغوا کر کے لے گئے۔

لیویز فورس کے سینِئر اہلکار نے بتایا کہ اغوا کیے لیے جانے والے مزدور مقامی ہیں اور ان کا تعلق شوران سے ہے۔

خیال رہے کہ تین روز قبل ضلع کچھی کے علاقے بولان میں بلوچ علیحدگی پسندوں نے کوئٹہ سے پشاور جانے والی مسافر ٹرین پر حملہ کرکے اس کے مسافروں کو یرغمال بنایا تھا۔