بنوں–لکی مروت سرحد پر جھڑپ: پولیس اور سکیورٹی فورسز کی کارروائی میں 7 شدت پسند ہلاک

بنوں +لکی مروت (نمائندگان ڈیلی اردو) پاکستان کے صوبہ خیبر پختونخوا میں بنوں اور لکی مروت کی سرحدی پٹی پر پولیس، سی ٹی ڈی اور سکیورٹی فورسز کے ساتھ جھڑپ میں کالعدم تحریک طالبان پاکستان کے سات شدت پسند ہلاک ہو گئے ہیں۔

پولیس کے مطابق تختی خیل کے علاقے ہوید میں 15 سے 20 مسلح افراد کی موجودگی کی اطلاع پر امن کمیٹیوں کے ارکان نے ابتدائی طور پر علاقہ گھیرے میں لیا۔ بعدازاں پولیس، سی ٹی ڈی اور سکیورٹی فورسز موقع پر پہنچیں، جس کے نتیجے میں فائرنگ کے تبادلے میں سات شدت پسند مارے گئے۔ 

حکام کے مطابق کارروائی میں کوئی اہلکار زخمی نہیں ہوا۔

ڈی آئی جی بنوں ریجن سجاد خان نے کہا کہ مقامی عوام نے بڑی تعداد میں پولیس اور سکیورٹی فورسز کے ساتھ کھڑے ہو کر بھرپور تعاون کیا۔ ان کا کہنا تھا کہ تختی خیل/ہوید میں کالعدم تحریک طالبان پاکستان کے خلاف یہ کارروائی جوانوں کی بہادری اور پیشہ ورانہ صلاحیتوں کا ثبوت ہے۔

انہوں نے مزید کہا کہ بنوں اور لکی مروت پولیس، سی ٹی ڈی اور سکیورٹی فورسز عوام کے جان و مال کے تحفظ کو اپنا اولین فرض سمجھتی ہیں۔

آئی جی پی خیبر پختونخوا ذوالفقار حمید نے بھی اس کارروائی کو سراہتے ہوئے کہا کہ پولیس نے ہمیشہ دہشت گردوں کا فرنٹ لائن پر مقابلہ کیا اور ان کے عزائم ناکام بنائے۔