بنوں سے ایف سی کے دو اہلکار عسکریت پسندوں کے ہاتھوں اغوا

بنوں (نمائندہ ڈیلی اردو) پاکستان کے شورش زدہ صوبہ خیبر پختونخوا کے ضلع بنوں کے علاقے پیران داؤد شاہ میں پولیس اسٹیشن کینٹ کی حدود سے فرنٹیئر کانسٹبلری (ایف سی) کے دو اہلکاروں کو عسکریت پسندوں نے اغوا کر لیا۔

اغوا کیے گئے اہلکاروں کی شناخت سپاہی راج ولی اور سپاہی عظمت (پلاٹون نمبر 553 دریوبہ) کے ناموں سے ہوئی ہے۔ دونوں اہلکار کرم گڑھی سے چھٹی پر واپس آرہے تھے کہ راستے میں عسکریت پسندوں نے انہیں روک کر اپنے ساتھ لے گئے۔

پولیس ذرائع کا کہنا ہے کہ دونوں اہلکاروں کو اغوا کے بعد نامعلوم مقام پر منتقل کر دیا گیا ہے، جبکہ قانون نافذ کرنے والے ادارے علاقے میں شواہد اکٹھے کرنے اور واقعے کی تفتیش میں مصروف ہیں۔

پولیس حکام کے مطابق واقعے سے متعلق مزید معلومات حاصل کی جا رہی ہیں اور اہلکاروں کی بازیابی کے لیے اقدامات تیز کر دیے گئے ہیں۔