بنوں: کنگر پل پولیس چوکی پر دہشت گردوں کا حملہ ناکام، حملہ آور فرار

پشاور (ڈیلی اردو) پاکستان صوبہ خیبرپختونخوا کے ضلع بنوں میں کنگر پل پولیس چوکی پر دہشت گردوں نے جدید اور خودکار ہتھیاروں سے حملہ کیا، تاہم پولیس نے بہادری سے مقابلہ کرتے ہوئے حملے کو ناکام بنا دیا۔

ڈیلی اردو کے مطابق، پولیس کی بھرپور جوابی کارروائی کے باعث حملہ آور فرار ہوگئے۔ پولیس کی اضافی نفری موقع پر پہنچ چکی ہے اور دہشت گردوں کی تلاش کے لیے علاقے کی ناکہ بندی جاری ہے۔

پولیس حکام کے مطابق حملے میں کسی جانی نقصان کی اطلاع نہیں ہے، تاہم یہ پولیس چوکی پہلے بھی کئی بار دہشت گردوں کے نشانے پر رہ چکی ہے۔

یاد رہے کہ گزشتہ ماہ بنوں کے علاقے فتح خیل میں بھی ایک پولیس چیک پوسٹ پر دہشت گردوں نے حملہ کیا تھا، جس میں دو پولیس اہلکار ہلاک ہو گئے تھے۔ اس حملے میں بھی دہشت گردوں نے ہلکے اور بھاری ہتھیاروں کا استعمال کرتے ہوئے پولیس چوکی کا کنٹرول حاصل کرنے کی کوشش کی تھی، تاہم اہلکاروں کی بروقت اور مؤثر جوابی کارروائی کے باعث دہشت گرد اپنے مقصد میں ناکام ہو گئے تھے۔

حکام کا کہنا ہے کہ سیکیورٹی فورسز اور پولیس علاقے میں دہشت گردوں کے خلاف کارروائی جاری رکھے ہوئے ہیں تاکہ مستقبل میں ایسے حملوں کو روکا جا سکے۔