بنوں: 3 دہشت گردانہ واقعات، پولیس اہلکار ہلاک، 14 زخمی، 4 شدت پسند مارے گئے

بنوں (ڈیلی اردو رہورٹ) پاکستان کے شورش زدہ صوبے خیبر پختونخوا کے ضلع بنوں میں جمعرات کو تین دہشت گردانہ واقعات رپورٹ ہوئے، جن میں پولیس اہلکار ہلاک اور متعدد شہری و اہلکار زخمی ہوئے، جبکہ دہشتگردوں کے خلاف کارروائی میں چار شدت پسند ہلاک ہوئے۔

پہلا واقعہ: ممند خیل آپریشن

بنوں کے علاقے تھانہ کینٹ کی حدود ممند خیل میں پولیس اور سیکیورٹی فورسز نے دہشتگردوں کے خلاف مشترکہ سرچ آپریشن کیا۔ شدید فائرنگ کے تبادلے میں پولیس اہلکار عابد خان ہلاک جبکہ 10 پولیس اہلکار اور 4 عام شہری زخمی ہوئے۔

زخمیوں میں ڈی ایس پی ملک احسان اللہ خان اور دیگر پولیس اہلکار شامل ہیں۔ زخمیوں کو فوری طور پر ڈسٹرکٹ ہیڈکوارٹر اسپتال بنوں منتقل کیا گیا۔

پولیس کے مطابق آپریشن کے دوران چار شدت پسند ہلاک ہوئے، تاہم ان کے ساتھی زخمی اور ہلاک شدہ دہشتگردوں کو اپنے ساتھ لے گئے۔ دہشتگردوں نے ایک ایمبولینس اور ایک شہری کو یرغمال بھی بنا لیا، جن کی بازیابی کے لیے سرچ آپریشن جاری ہے۔

ہلاک ہونے والے اہلکار عابد خان کی نماز جنازہ پولیس لائن بنوں میں سرکاری اعزاز کے ساتھ ادا کی گئی۔ ڈی پی او بنوں سلیم عباس کلاچی نے کہا: ’’ہلاک ہونے والا پولیس اہلکار ہمارا بھائی ہے، ہم اپنے بھائی کا بدلہ ہر حال میں لیں گے۔ دہشتگردوں کے خلاف آپریشنز مزید تیز کر دیے گئے ہیں۔‘‘

دوسرا واقعہ: بکاخیل دھماکہ

بنوں کے علاقے بکاخیل میں بارودی مواد سے ایک تعلیمی ادارے بی ایچ یو کو نشانہ بنایا گیا۔ زور دار دھماکے سے عمارت کو شدید نقصان پہنچا، تاہم کوئی جانی نقصان نہیں ہوا۔ پولیس نے علاقے کو گھیرے میں لے کر سرچ آپریشن شروع کر دیا ہے۔

تیسرا واقعہ: اغوا شدہ نوجوان کی لاش

تھانہ کینٹ کی حدود پیپل داودشاہ سے نوجوان کی گولیاں لگنے سے ہلاک شدہ لاش برآمد ہوئی۔ 

پولیس کے مطابق نوجوان احمد نزیر ولد نورگل کو دو روز قبل نامعلوم دہشتگردوں نے اغوا کیا تھا۔ کل رات اس کی لاش پیپل بازار میں پھینکی گئی تھی۔